Бразилиянинг Амазония минтақасидаги тубжой қабилаларидан бири — яномамилар орасида биринчи марта коронавирус инфекциясини юқтириб олиш ҳолати қайд этилди. Бу ҳақда Al Jazeera хабар берди.
Маълум қилинишича, касаллик 15 ёшли ўсмирда аниқланган. У Бразилия шимолидаги Рорайма штатининг Боа-Виста шаҳридаги шифохонага, интенсив терапия бўлимига ётқизилган.
Амазония тропик ўрмонларининг туб аҳолиси ташқи дунёдан узилганлиги ва иммунитет ҳосил қилиши қийинлиги сабабли четдан келган касалликлар олдида заиф ҳисобланади. Шу боис яномами ҳиндулари коронавирус инфекцияси сабабли бутунлай қирилиб кетиши мумкинлиги тахмин қилинмоқда.
Бразилия соғлиқни сақлаш вазири Луис Энрике Мандеттанинг айтишича, яномамилар орасида коронавируснинг аниқлангани жуда хавотирли ҳисобланади. Унинг қайд этишича, коронавирус мамлакатнинг туб қабилаларига жиддий зарба бериши, уларнинг қирилиб кетишига олиб келиши мумкин.
Бразилияда туб қабилаларнинг тахминан 800 минг нафар вакили яшайди ва улар 300 дан ортиқ этник гуруҳга бўлинади. Мамлакатда яномами қабиласининг тахминан 27 мингта аъзоси мавжуд. Қабила ХХ асргача бутун дунёдан ажралган ҳолда яшаган, бироқ ундан кейин қабила қизамиқ ва безгак каби касалликлар сабабли бир неча марта қирилиб кетиш хавфи остида қолган.
Изоҳ (0)