АҚШ президенти Дональд Трамп «Хитой ва Россиянинг дезинформация кампаниясига» қарамай мамлакатнинг етакчилигини намойиш этиш истагида Италияга ёрдам кўрсатиш бўйича меморандумни имзолади. АҚШда COVID-19 коронавируси билан касалланиш бўйича 502 мингга яқин ҳолат қайд этилган бўлса, Италияда — 147 мингдан ортиқ, деб хабар беради «Коммерсантъ».
«АҚШ ҳукуматининг биринчи даражали мажбурияти америкаликлар ҳақида қайғуриш бўлишига қарамай, COVID-19 пандемиясига қарши курашда Италияга кўрсатилган ёрдам иқтисодий инқироз оқибатларини юмшатишга, шунингдек, АҚШнинг Хитой ва Россия томонидан амалга оширилаётган дезинформация компаниясига қарамай, етакчилигини намоён этади», — дейилади меморандумда.
Аввалроқ АҚШ давлат котиби Майкл Помпео Россия, Хитой ва Эронни коронавирус ҳақида ёлғон маълумотлар тарқатишда айблаган эди. Давлат котибининг сўзларига кўра, улар АҚШнинг COVID-19’га қарши кураш йўлидаги ҳаракатларини обрўсизлантиришга уринган.
Эслатиб ўтамиз, Россия Италияга беморларни даволаш ва биноларни дезинфекция қилишда ёрдами тегадиган ҳарбий мутахассисларни юборган эди. Европа Иттифоқи дипломатияси раҳбари Жозеп Боррель шундан сўнг, Москва ва Пекин коронавирус пандемиясидан ўз таъсирини кенгайтириш йўлида фойдаланаётганини маълум қилганди. Италия бош вазири Жузеппе Конте Россия Римга сиёсий мақсадларни кўзлаб ёрдам бераётгани тўғрисидаги фикрларни «чуқур ҳақорат» деб атаган.
Изоҳ (0)