АҚШ разведкаси Уханда тарқалган коронавируснинг ҳалокатли бўлиши ҳақида ҳукуматни ноябрь ойидаёқ огоҳлантиргани маълум бўлди

АBS телеканали хабарига кўра, АҚШ разведкаси Уханда тарқалган инфекция одамлар ҳаёти учун ҳалокатли бўлиши мумкинлиги ҳақида ҳукуматни 2019 йилнинг ноябрь ойи охирларидаёқ огоҳлантирган, деб ёзмоқда «РБК». Бу ҳақдаги маълумотлар АҚШ президенти учун тайёрланаётган синчковлик билан текшириладиган ҳисоботга киритилган.

Қайд этилишича, телеканал бу хабарни АҚШ разведкаси ҳисоботи тафсилотларидан хабардор бўлган 4 та манбага таяниб маълум қилган.

Уларнинг ҳисоботи, ушбу ҳужжат билан таниш бўлган телеканалнинг икки манбасига кўра, Тиббий разведка миллий маркази (National Center for Medical Intelligence, NCMI) маълумотларига асосланган. NCMI тутиб қолинган хабарлардан ва сунъий йўлдошдан олинган суратлардан фойдаланган.

Разведка бунда АҚШ ва Осиё вакилларига таҳдидни кўргани учун тревога кўтарган. «Таҳлилчилар бу ҳалокатли воқеа бўлади, деган хулосага келган», — дейди канал суҳбатдошларидан бири. NCMI ҳисоботидаги маълумотлар АҚШ Ҳарбий разведка агентлиги, Пентагон ва Оқ Уйга бир неча бор юборилган.

Қайд этилишича, давлат аппаратларида қарор қабул қилувчиларга ҳисоботлар декабрь ойи давомида бир неча бор ўқиб эшиттирилган, муаммонинг батафсил тавсифи эса президентнинг кундалик разведка ҳисоботида январь ойи бошларида пайдо бўлган. Телеканал манбасининг таъкидлашича, ушбу ҳужжатда фақат бир ҳафта давомида текширилган маълумотлар кўрсатилади.

Хабарда айтилишича, ўтган ҳафтада аноним манбалар Bloomberg’га Хитой коронавируснинг тарқалиш кўламини яшириб, касалланганларнинг умумий сонини ҳам, вафот этганлар сонини ҳам камайтириб кўрсатганини маълум қилган. АҚШ бу борада Хитой ягона мамлакат эмас, деган фикрда. Улар Эрон, Индонезия, Россия ва Шимолий Корея ҳам статистика маълумотларини камайтириб кўрсатган бўлиши мумкин, деб ҳисобламоқда.

Президент Дональд Трамп пандемиянинг олдини олмагани учун Жаҳон соғлиқни сақлаш ташкилотини айблаган. «ЖССТ ҳаммасини барбод қилди. Асосан АҚШ томонидан молиялаштирадиган ташкилот нима учундир бор эътиборини Хитойга қаратди», — деган Трамп.

Жонс Ҳопкинс маълумотларига кўра, айни пайтда дунё бўйича коронавирусга чалинганлар сони 1 484 811 нафарга, вафот этганлар эса 88 538 нафарга етди. АҚШ коронавирус қурбонлари сони бўйича дунёда иккинчига айланди. Мамлакатда бир суткада 1 965 бемор вафот этди — бу янги антирекорд.

Ўзбекистонда эса коронавирусга чалинганлар сони 555 нафарга етди