Қозоғистонда 120 нафар тиббиёт ходими коронавирус юқтириб олди, деб хабар бермоқда Tengrinews. Бу ҳақда брифингда мамлакат бош санитар шифокори Айжан Есмагамбетова маълум қилган.
«Уларнинг 67 нафари коронавирусга гумонланган ёки касалланиб бўлган беморларга ёрдам берган тиббиёт ходимидир», — дейди у.
Унинг айтишича, касалланган шифокорлардан бири оғир аҳволда, 9 кишининг аҳволи ўртача оғирликда, қолганларида касаллик аломатларсиз, енгил кечмоқда.
«Ходимларнинг тайёргарлиги ва етарлилигига келсак, бугунги кунда 16 минг нафар тиббиёт ходими даволаш ва профилактика масалаларига жалб қилинган. Шунингдек, 10 минг нафар тиббиёт ходимларидан иборат захира шакллантирилган», — дейди мамлакат бош санитар шифокори.
Унинг таъкидлашича, карантин шароитида барча тиббиёт ташкилотларида режали ёрдам чекланган бўлиб, зарур ҳолатда ушбу ташкилотларнинг барча тиббий ходимлари коронавирусга чалинган беморларга ёрдам бериш учун жалб этилиши мумкин.
Ўтган ҳафтада соғлиқни сақлаш вазири Элжан Биртанов онлайн брифинг чоғида иш жойида коронавирус юқтириб олган 28 нафар шифокор ҳақида маълум қилган. Вазир бундан ташқари коронавирус юқтирган яна бир гуруҳ тиббиёт ходимлари борлиги, улар вирусни қариндошларидан юқтирганини, яъни COVID-19’га қарши кураш фаолиятига боғлиқ бўлмаган ҳолда касалланганлигини билдирган, бироқ уларнинг сонига аниқлик киритмаган.
Қозоғистон ҳукумати қарорига кўра, мамлакатда эпидемияга қарши тадбирларда иштирок этган шифокорларга 212,5 минг тенге (тахминан 4,7 миллион сўм)дан 850 минг тенге (тахминан 19 миллион сўм)гача пул тўланади.
Ўзбекистонда эса коронавирусга қарши курашда иштирок этадиган шифокорларга 25 миллион сўмдан, ҳамшираларга эса 15 миллион сўмдан тўланади. Айни пайтда мамлакатда коронавирусга чалинган беморлар сони 504 кишига етган бўлиб, уларнинг 11 нафари Вирусология илмий-текшириш институти ходимидир.
Аввалроқ Қирғизистонда коронавирус билан касалланганлар сони 228 кишига етгани, уларнинг 9 нафари тиббиёт ходими эканлиги ҳақида хабар берилган эди.
Изоҳ (0)