UFC президенти Дэйна Уайт жинсий зўравонлик ва товламачиликда айбланиб судга берилди.
Las Vegas Review-Journal нашрининг хабар қилишича, кўчмас мулк агенти Эрнесто Жошуа Рамос Кларк округи судига шикоят қилган. Аризада Уайт беш йил аввалги ишни ёпиш мақсадида Рамосга ваъда берган 450 минг долларни тўламаганлиги кўрсатилган.
Таъкидланишича, 2014 йилда Рамос Уайт ва раққоса қиз ўртасидаги ишқий муносабатлар тасвирланган видеони тарқатиб юбормаслик учун Дэйнадан 200 минг доллар сўраган. 2015 йилда Рамос Федерал бюро ходимлари томонидан ҳибсга олинади ва бир йил қамоқда ўтиради.
Шу билан бирга, Уайт иш ёпилганидан кейин мазкур масала ортиқ юзага чиқмаслиги учун Рамосга 450 минг доллар ваъда қилгани айтилмоқда. Бироқ Рамос бу пулларни олмаган ва шу сабаб UFC президентини судга берган.
Уайт бу масалага қуйидагича шарҳ берди.
«Ҳозиргина мени судга беришгани ҳақида эшитдим. Бу йигит беш йил аввал мендан пул ундиришга уриниб, федерал қамоққа йўл олганди. Энди ўзига ўхшаган судланган жиноятчини адвокатликка ёллаб, мендан яна пул ундирмоқчи — 10 миллион доллар. Ўтган сафар у мендан пул ололмаганди ва бу сафар ҳам ололмайди. Суд шикоятни бекор қилишини интизорлик билан кутяпман. Ниҳоят бу аблаҳлардан бутунлай қутуламан», — дейди Уайт.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)