Ўтган бир сутка ичида АҚШда коронавирус оқибатида 770 киши вафот этди. Бу ҳақда федерал ва маҳаллий ҳукумат томонидан тақдим этилаётган маълумотларга таяниб, CNN хабар берди.
Маълумотларга кўра, ушбу кўрсаткич мамлакатда бир кун ичида кузатилган энг юқори ўлим даражасидир. Пандемия бошланганидан буён бутун мамлакат бўйлаб коронавирус оқибатида вафот этганлар сони 3774 кишига етган.
31 март ҳолатига кўра, АҚШ коронавирус қурбонлари сони бўйича Хитойни ортда қолдириб, учинчи ўринга чиқиб олди. Ўлим даражаси энг юқори кўрсаткичга эга давлатлар орасида Италия — биринчи ўринда (12 428 киши), ундан кейин Испания (8269) жой олган.
Сўнгги маълумотларга кўра, Ўзбекистонда коронавирус билан касалланганлар сони 172 нафарга етган.
Эслатиб ўтамиз, аввалроқ 12 март куни Умра сафаридан Туркия орқали қайтган наманганлик аёлнинг коронавирусга чалинган 72 ёшли онаси 27 март куни тонгда инфарктдан вафот этгани, унинг дафн маросимида бирорта ҳам қариндоши қатнашмагани ҳақида айтилганди. Бундан ташқари, коронавируснинг иккинчи қурбони — Тошкентда вафот этган 39 ёшли шифокор касаллигини яшириб, ўзини уйда даволашга урингани хабар қилинган эди.
Изоҳ (0)