АҚШ президенти Дональд Трамп коронавирус тарқалиши сабаб мамлакат аҳолисини жуда қийин икки ҳафта кутиб тургани ҳақида огоҳлантирди. Бу ҳақда президент Оқ уйда ўтказилган брифингда маълум қилди, деб хабар беради CNN.
«Ҳар бир америкалик олдинда бизни кутиб турган қийин кунларга тайёргарлик кўриб қўйишини истайман. Биз икки ҳафтада жуда оғир дамларни босиб ўтамиз», — дейди Трамп. Кейинроқ АҚШ етакчиси ушбу муддат уч ҳафтага узайиши мумкинлигини маълум қилган.
Шунингдек, у коронавирус билан содир бўлаётган вазиятни АҚШ шу кунгача дуч келган қийинчиклардан фарқ қилишини айтган. Шунга қарамай Дональд Трамп америкаликлар яқин вақт ичида «туннел охиридаги ёруғликка етишлари»га умид билдирган.
Президент администрацияси ҳузуридаги Вирусларга қарши кураш бўйича мувофиқлаштирувчи гуруҳ ҳисоб-китобларига кўра, АҚШда ўлим даражаси 100 мингдан 240 минг кишигача етиши мумкин. Ушбу маълумотлар ҳам брифинг давомида эълон қилинган. CNN’нинг таъкидлашича, ҳукумат коронавирус оқибатида вафот этадиганлар сонини биринчи бор расман тахмин қилган.
Экспертларнинг таъкидлашича, агарда АҚШ аҳолиси ҳукумат томонидан тавсия этилган чеклов чораларига риоя қилмаса, ушбу рақамлар ўсиши мумкин.
Аввалроқ Трамп коронавирус оқибатида 200 минг америкаликнинг ўлишини «яхши» сценарий деб атаган эди. АҚШ аллергия ва юқумли касалликлар миллий институти директори Энтони Фаучи эса жорий йилнинг кузида COVID-19 коронавирусининг иккинчи тўлқини кузатилиши мумкинлигини маълум қилган.
Изоҳ (0)