Хитой соғлиқни сақлаш миллий комиссияси маълумотларига кўра, мамлакатда сўнгги суткада коронавирусдан 6 киши вафот этди, касалланиш билан боғлиқ 67 та ҳолат аниқланди — уларнинг барчаси четдан юқтирилган, деб хабар бермоқда «РИА Новости».
Мамлакатда умумий ҳисобда коронавирусни четдан юқтириш билан боғлиқ 541 та ҳолат қайд этилган. Шунингдек, 401 нафар бемор тузалгани айтилган.
«Давлат соғлиқни сақлаш қўмитасига 31 та провинциядан коронавирус билан касалланиш тасдиқланган 81 285 та ҳолат тўғрисида маълумот келиб тушди, шу жумладан, ҳозирда касалланганлар сони 3 947 кишини ташкил қилмоқда (улардан 1 235 нафари оғир аҳволда), 74 051 киши касалхонадан чиқарилди, 3287 нафари вафот этди», — дейилади хабарда.
Эпидемия ўчоғи бўлган Хубэй провинциясида, шу жумладан, Уханда сўнгги сутка давомида касалланиш билан боғлиқ бирорта ҳолат қайд этилмаган. Касалхонадан 391 киши (шундан 383 нафари Уханда) чиқарилган, беморларнинг 6 нафари вафот этгани қайд этилган.
Дунё бўйича COVID-19 коронавирус пандемиясига чалинганлар сони 400 минг кишидан, қурбонлар сони эса 18 мингдан ошиб кетди. Жонс Ҳопкинс университети маълумотларига кўра, беморлар сони кўплиги бўйича юқори бешликдан Хитой, Италия, АҚШ, Испания ва Германия жой олган.
Аввалроқ Хитойда илк бор хантавирус сабабли вафот этиш ҳолати қайд этилгани ҳақида хабар берилган эди.
Изоҳ (0)