«Милан» клуби ҳужумчиси Златан Ибрагимович ўзини футбол агенти сифатида синаб кўрмоқчи, дея хабар қилмоқда Calciomercato.
Хабар қилинишича, швециялик футболчи ўз агенти Мино Райоланинг шеригига айланиши мумкин. Футболчи айни дамда ушбу вариантни кўриб чиқмоқда.
Аввалроқ Ибрагимович «Милан»нинг футбол бўлими раҳбари Звонимир Бобаннинг истеъфога чиқарилганидан норози бўлгани ва мавсум якунида клубни тарк этиш ниятида экани хабар қилинганди. Шунингдек, Златан жорий мавсум якунида футболчилик фаолиятини якунлаши ҳақида ҳам айтилганди.
Ибрагимовични мураббийлик фаолияти ҳам қизиқтирмаяпти.
38 ёшли футболчи қишки трансфер ойнасида «Лос-Анжелес Гэлакси» жамоасидан миланликлар сафига келиб қўшилганди. Ушбу мавсум Ибра «Милан»да 10 та ўйин ўтказиб, 4 гол ва битта самарали узатмага муаллиф бўлди.
Аввалроқ футболчи «Манчестер Юнайтед», ПСЖ, «Барселона», «Интер», «Ювентус», «Аякс» ва «Малмё» каби жамоаларда тўп сурган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)