Гулистон шаҳрига 27 март, жума кунидан бошлаб кириш ва чиқиш тўхтатилади. Бу ҳақда «Дарё»га Сирдарё вилояти ҳокимлиги матбуот хизмати хабар бермоқда.
«Вилоят ҳудудига коронавирус касаллигининг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича вилоят махсус комиссиясининг қарорига мувофиқ, 27 март куни соат 00:01 дан бошлаб Гулистон шаҳрига кириш ва чиқиш вақтинча тўхтатилади.
Бундан кўзланган мақсад коронавирус инфекциясининг вилоят ҳудуди бўйлаб тарқалишининг олдини олиш эканлиги билдирилган.
Ушбу чекловлар юк ташиш билан боғлиқ ҳолатлар, шунингдек, шаҳарда доимий яшовчи шахсларга Гулистон шаҳрига кириш учун, вилоят марказидаги маҳаллий давлат ҳокимияти органлари, ҳуқуқ-тартибот идоралари, бошқарма, идора ва ташкилотларда меҳнат фаолиятини амалга ошираётган раҳбар ва ходимлар, шифокор ва ҳамширалар, санитария-эпидемиологик осойишталик маркази ходимлари ҳамда вилоят туманларига бириктирилган маъсул ходимларга нисбатан татбиқ этилмайди.
Гулистон шаҳрига кириш-чиқиш фақатгина иккита йўналиш бўйича, яъни биринчиси — Гулистон шаҳри Гулистон кўчасига йўл ўтказгич кўприк орқали ҳамда Гулистон шаҳрига Дўстлик қўрғони орқали Хондамир кўчасига кириб-чиқиш ташкил этилган карантин постлари орқали транспорт воситалари ва йўловчилар дезинфекция қилинган ҳолда киритилиб, чиқарилади. Гулистон шаҳрига бошқа йўналишлардан кириб-чиқиш жойлари тўлиқ ёпилади.
Қўйилган чекловлар ҳамда карантин қоидаларини бузган шахсларга нисбатан қонунчиликда белгиланган чоралар кўрилади.
Аввалроқ Сурхондарёдаги «Дарбанд» мунтазам йўл-патрул хизмати маскани ёпилгани, Наманган шаҳрига 26 мартдан бошлаб кириш-чиқиш тўхтатилгани, 6 вилоят аҳолисини Тошкентга олиб борувчи Самарқанд постларида кириб-чиқиш тўхтатилгани хабар берилганди.
Шунингдек, Тошкент шаҳрини вилоятлар билан боғловчи постлар ёпилгани, Қамчиқ довонида транспортлар ҳаракати тўхтатилгани ҳам маълум қилинган.
Изоҳ (0)