Коронавирус илк бор аниқланган Ухань шаҳарида транспорт қатновларига чекловлар 8 апрель куни олиб ташланади, деб хабар бермоқда «РБК». Бу ҳақда Хубэй провинцияси ҳукумати сайтида маълум қилинди.
Қайд этилишича, провинциянинг қолган қисмларига кириш ва чиқишга қўйилган чекловлар 25 март куни олиб ташланади.
Эслатиб ўтамиз, Хитой ҳукумати шаҳарга кириш-чиқишни коронавирус инфекцияси тарқалишининг олдини олиш мақсадида 22 январь куни ёпиб қўйганди. Ухань автобус ва поездлар учун ёпилган, авиарейслар вақтинча тўхтатилганди.
Ухань Хитойнинг йирик шаҳарларидан бири бўлиб, Хубэй провинциясининг пойтахтидир. Шаҳарда 11 миллиондан ортиқ аҳоли истиқомат қилади. Коронавирус билан касалланишнинг дастлабки ҳолати денгиз маҳсулотлари сотиладиган бозорда аниқланганди.
Сўнгги маълумотларга кўра, Хубэйда 67 801 киши вирус юқтириб олган, шундан 50 мингдан ортиғи Уханда аниқланган. Провинцияда коронавирусдан 3 160 киши вафот этган.
Айни вақтда Хитой ҳудудида жами 81 171 киши коронавирус билан касалланган, вирус қурбонлари сони эса 3277 кишига етган. Касалланганларнинг 90 фоиздан ортиғи соғайиб кетди.
Ўзбекистонда эса коронавирус инфекциясини юқтириб олганлар сони 50 нафарга етган. Мамлакатда коронавирус инфекцияси тарқалишига қарши кучайтирилган тартиб жорий этилди.
Изоҳ (0)