Ижтимоий тармоқларда республиканинг барча ҳудудларида коронавирус пандемияси туфайли эълон қилинган карантин вақтида фуқароларни ваҳимага солувчи ва ҳуқуқ-тартиботни бузишга ундовчи миш-мишлар тарқатган шахслардан бири жаримага тортилди. Бу ҳақда Сурхондарё вилояти ИИБ матбуот хизмати хабар берди.
Маълум бўлишича, Telegram’даги каналлардан бирининг фойдаланувчиси 20 март куни соат 12:38 да «икки кишида аниқланди», дея гуруҳга коронавирус ҳақида одамларни чалғитувчи, жамиятда ваҳима уйғотувчи ёлғон маълумот тарқатган.
Тезкор қидирув ҳамкорлик бошқармаси масъул ходимлари томонидан олиб борилган тезкор суриштирув ишлар натижасида гуруҳга ёлғон маълумот тарқатган профил эгаси ва фойдаланувчиси Сурхондарё вилояти, Музработ туманида истиқомат қилиб, Термиз шаҳрида савдо шохобчаларининг бирида сотувчи бўлиб ишлаб келаётган фуқаро А.Б. эканлиги аниқланган.
Унга нисбатан 23 март куни Маъмурий ишлар бўйича Термиз шаҳар судининг қарорига кўра, Маъмурий жавобгарлик тўғрисидаги кодекснинг 205-моддасида кўрсатилган (Фавқулодда ҳолат тартиби шароитида жамоат тартибига тажовуз қилиш) ҳуқуқбузарликни содир этганликда айбдор деб топилиб, унга нисбатан базавий ҳисоблаш миқдорининг 5 баравари, яъни 1 миллион 115 минг сўм миқдорида жарима жазоси тайинланган.
Эслатиб ўтамиз, аҳоли орасида ваҳима чиқаришга қаратилган материалларни тайёрлаш ёки уларни тарқатиш мақсадида сақлаш 44 миллион 600 минг сўмдан 89 миллион 200 минг сўмгача миқдорда жарима ёки 3 йилгача ахлоқ тузатиш ишлари ёхуд 1 йилдан 3 йилгача озодликни чеклаш ёки 3 йилгача озодликдан маҳрум қилиш билан жазоланади.
Аҳоли орасида ваҳима чиқаришга қаратилган маълумотлар ва материалларни ҳар қандай шаклда тарқатиш 66 миллион 900 минг сўмдан 89 миллион 200 минг сўмгача миқдорда жарима ёки 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади.
Изоҳ (0)