Тошкент шаҳар Юнусобод туманида электр энергияси истеъмоли бўйича тажриба тариқасида ўрнатилган базавий меъёрлар коронавирус сабабли бекор қилинади. Бу ҳақда Ўзбекистон Энергетика вазирлиги хабар берди.
Маълум қилинишича. Энергетика вазирлиги томонидан Адлия вазирлиги ва Молия вазирлигига Юнусобод тумани аҳолиси учун жорий этилган электр энергияси истеъмолининг базавий меъёрларини бекор қилиш тўғрисида сўров жўнатилган.
Қайд этилишича, бундай қарор коронавирус сабабли жорий этилган карантин билан боғлиқ. Карантин сабабли кўплаб кишилар вақтини уйда ўтказади ва шунга мос равишда энергияни кўп сарфлайди. Ўрнатилган базавий меъёрлар эса туман аҳолиси учун бошқа туманлар аҳолиси билан тенг бўлмаган ҳолатни юзага келтиради.
Электр энергияси истеъмоли бўйича базавий меъёрлар Юнусобод туманида тажриба тариқасида 2019 йил 1 январдан жорий қилинган. Унга кўра, битта абонент учун ойлик истеъмол миқдори 300 киловатт соатни ташкил этади. Базавий меъёрдан ортиқ истеъмол қилинган энергия ҳажми учун тўлов ҳисоблашда 1,2 баравар миқдоридаги оширилган коэффициент қўлланилади.
Эслатиб ўтамиз, Вазирлар Маҳкамасининг «Коронавирус инфекцияси тарқалишига қарши қўшимча чора-тадбирлар тўғрисида»ги қарорига мувофиқ, 24 мартдан Ўзбекистонда коронавирус инфекцияси тарқалишига қарши кучайтирилган тартиб жорий этилди, деҳқон бозорларидан ташқари барча бозорларнинг фаолияти тўхтатилди, Умумий овқатланиш корхоналари фаолияти ҳам вақтинча тўхтатилди. Бундан ташқари, Ўзбекистонда маҳаллий авиақатновлар ва республика бўйлаб поездларда йўловчи ташиш тўхтатилди.
Айни пайтда Ўзбекистонда коронавирусга чалинганлар сони 50 нафарни ташкил этмоқда. Соғлиқни сақлаш вазирлигининг маълум қилишича, Ўзбекистонда коронавирус инфекцияси билан касалланганларнинг 30 нафари чет элда бўлиб қайтган. 18 нафар фуқаро эса улар билан яқин мулоқотда бўлиб, вирусни юқтириб олган.Мавзуга доир: Резонанс: Коронавирус Ўзбекистонда? Уни қачон енгамиз?
Изоҳ (0)