Вазирлар Маҳкамасининг «Тошкент иссиқлик электр марказида қуввати 27 МВт бўлган иккита буғ-газ қурилмасини қуриш» инвестиция лойиҳасини амалга ошириш чора-тадбирлари тўғрисида»ги қарори лойиҳаси муҳокама учун жойлаштирилди.
Қайд этилишича, 2015 йил 25 октябрда Ўзбекистон ва Япония халқаро ҳамкорлик агентлиги (JICA) ўртасида «Тошкент когенерацион иссиқлик электр станциясини қуриш» инвестиция лойиҳасини молиялаштириш учун 10 йил имтиёзли даврга 40 йилда қоплаш муддати билан умумий қиймати 12 миллиард япон иенаси бўлган қарз келишуви имзоланган.
2019 йил 18 июлда «Тошкент Иссиқлиэлектрмаркази» АЖ ва Tractebel Engineering GmbH (Германия) ва Eurasian Consulting and Engineering Services GmbH (Германия) қўшма корхонаси ўртасида «Тошкент иссиқлик электр марказида қуввати 27 МВт бўлган иккита буғ-газ қурилмасини қуриш» инвестиция лойиҳаси доирасида умумий қиймати 6,54 миллион доллар эквивалентига тенг бўлган консултация хизматини кўрсатиш шартномаси имзолаган.
Лойиҳанинг амалга ошириш муддати 3 йил (2020—2023 йиллар) этиб белгиланган.
Энергетика вазирлиги, Молия вазирлиги, Инвестициялар ва ташқи савдо вазирлиги ҳамда «Иссиқлик электр станциялари» АЖнинг қарз келишуви маблағларини лойиҳани амалга оширишга йўналтириш тўғрисидаги таклифи маъқулланиши мумкин.
JICA қарз қайтариш билан боғлиқ бўлган барча харажатларни қоплаш «Тошкент Иссиқлиэлектрмаркази» АЖнинг маблағлари ҳисобидан амалга оширилади.
ТИВ «Тошкент Иссиқлиэлектрмаркази» АЖ ва «Иссиқлик электр станциялари» АЖ аризаларига биноан, лойиҳани амалга ошириш жараёнида иштирок этаётган хорижий мутахассисларни яшаб туриш жойи бўйича кўп маротабалик визалар ва вақтинчалик рўйхатдан ўтишлари давлат божи ундирилмасдан амалга оширилишини таъминлайди.
ИИВ «Тошкент Иссиқлиэлектрмаркази» АЖ ва «Иссиқлик электр станциялари» АЖнинг аризаларига биноан, лойиҳани амалга оширишда иштирок этаётган хорижий мутахассисларнинг яшаш жойи бўйича давлат божи ундирмаган ҳолда кўп марталик визалар ва вақтинча яшаш учун рухсатномалар бериш ҳамда уларни узайтиришни таъминлайди.
Аввалроқ Навоий ИЭС учинчи буғ-газ қурилмасини қуриш учун Япониядан 1 млрд доллардан ортиқ қарз олиниши хабар берилган эди.
Изоҳ (0)