Голливуднинг таниқли юлдузли жуфтлиги 43 ёшли Райан Рейнольдс ва 32 ёшли Блейк Лайвли коронавирус билан курашиш жараёнига ўз ҳиссасини қўшишга қарор қилди. Бу ҳақда Cosmopolitan нашри хабар берди.
Актёрлар коронавирус инфекциясининг тарқалишидан жиддий хавотирда эканлигини билдирган. Эр-хотин пандемия туфайли оғир вазиятга тушиб қолган одамларга ёрдам беришга қарор қилди.
Райан Рейнольдс ва Блейк Лайвли АҚШ ва Канададаги иккита хайрия лойиҳаси — Feeding America ва Food Banks Canada ҳисобига бир миллион доллар ўтказган. Ушбу нотижорат озиқ-овқат ташкилотлари қариялар ва кам таъминланган оилаларни озиқ-овқат билан таъминлайди.
«Ўйлайманки, COVID-19’ни офат десам гапимга ҳеч ким эътироз билдирмайди. У қариялар ва кам таъминланган оилаларга қаттиқ таъсир кўрсатди. Блейк ва мен бир миллион доллар хайрия қиламиз. Агар сизда имконият бўлса, ушбу ташкилотлар ёрдамга муҳтож. Танангиз ва қалбингизни асранг. Қалбингизда қувонч учун жой қолдиринг. Изоляция қилинган ва сиз билан мулоқотга муҳтож бўлиши мумкин бўлган одамга қўнғироқ қилинг», — дейди Райан Рейнольдс.
Рейнольдс ва Лайвлининг турмуш қурганига саккиз йил бўлди. Улар уч нафар қиз — беш ёшли Жеймс, уч ёшли Инес ва ўтган йили дунёга келган кичкинтойни тарбия қилмоқда.
Аввалроқ Американинг Microsoft компанияси асосчиси Билл Гейтс Хитойдаги янги коронавирус билан курашиш жараёнини қўллаб-қувватлаш учун ўз хайрия жамғармасидан беш миллион доллар ажратган эди.
Мавзуга доир:
Изоҳ (0)