«Милан» футбол клуби ҳужумчиси Златан Ибрагимович коронавирус пандемиясига қарши кураш учун пул йиғишни бошлади.
Швециялик футболчи Go Fund Me платформаси орқали махсус фонд ташкил қилган. Ундан тушган маблағ Италиядаги шифохоналарга берилади. Фонд саҳифасида маълум қилинишича, «Златан Ибрагимович» ники орқали ҳар бири 50 минг евродан икки марта пул келиб тушган.
«Италия менга шунчалик кўп нарса бердики, бу қийин дамларда ўзим учун севимли бўлган мамлакатга яхшиликларни қайтармоқчиман. Мен атрофимдаги одамлар билан касалхоналар учун маблағ йиғиш ва бу маълумотни кенг ёйиш учун бор имкониятимни ишга солдим. Бу жиддий муаммо ва биз видеоролик олиш билан чекланмай конкрет ёрдам беришимиз керак», — дея ёзади футболчи ўз Instagram’ида.
Златан шунингдек, бошқа спортчиларни ҳам фондга ҳайрия қилишга чақирди.
«Мен бу вирусга қарши курашда ҳамкасбларим, барча спортчилар ва ўз имконияти даражасида ҳайрия қила оладиган одамларнинг сахийлигига умид қилиб қоламан. Биз биргаликда барчамизнинг ҳаётимиз учун курашаётган касалхоналар, шифокор ва тиббиёт ходимларига ҳақиқий ёрдам кўрсата оламиз. Чунки бугун биз уларга мухлислик қиламиз. Келинг биргаликда бу вирусни улоқтириб ташлаймиз ва бу ўйинда ғалаба қозонамиз.
Агар вирус Златанга келмаса, Златан вирус ёнига боради», — дея қўшимча қилди Ибрагимович.
https://www.instagram.com/p/B94AT7RHHpd/
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)