Нью-Йорк шаҳри мэри Билл де Блазио коронавирус тарқалишининг олдини олиш мақсадида бар, кинотеатр ва бошқа кўнгилочар масканларни ёпишга қарор қилди, деб ёзади «РБК».
«Биз севимли инсонларимиз ҳаётини хавф остига қўйиш масаласи бўлмаганида ҳеч қачон қабул қилмайдиган бир қатор қарорларни қабул қиляпмиз. Яна бир радикал қадамни қўйиш пайти келди. Вирус Нью-Йорк аҳолиси бир-бирига жуда яқин бўладиган ресторан, барларда тез тарқалиши мумкин. Биз уларни ёпишга қарор қилдик», — дейди Блазио.
Шунингдек, тунги клублар, кинотеатрлар ва концерт заллари ҳам вақтинча иш фаолиятини тўхтатади.
Ушбу қарор 17 март, сешанба куни, маҳаллий вақт билан соат 9:00 дан кучга киради.
Эслатиб ўтамиз, АҚШда янги турдаги COVID-19 коронавирусининг тарқалиши сабаб Европа мамлакатларидан келувчилар учун 30 кунга вақтинчалик тақиқ ўрнатилди. Бироздан сўнг Дональд Трамп мамлакатда COVID-19 коронавирус инфекцияси тарқалиши оқибатида фавқулодда ҳолат режими эълон қилинганини билдирди.
Аввалроқ Ўзбекистондаги барча кинотеатрлар ҳам вақтинча ёпилиши ҳақида хабар берилган эди.
Коронавируснинг Ўзбекистондаги март ойида бўладиган тўйларга таъсир кўрсатмаслиги, ҳукумат Ўзбекистондаги диний идораларга диний маросимлар ўтказишни вақтинча чеклаш бўйича илтимос билан мурожаат қилгани айтилди. Шунингдек, барча спорт (масалан, Суперлига), маданий (жумладан, концерт) ва бошқа тадбирлар, шунингдек, Наврўз тантаналари ва у билан боғлиқ бошқа оммавий маросимлар ҳам бекор қилинган.
Изоҳ (0)