Қозоғистонда коронавирус туфайли фавқулодда ҳолат эълон қилинди

Қозоғистонда коронавирус тарқалиши муносабати билан 16 мартдан фавқулодда ҳолат режими жорий қилинади, деб ёзади “Zakon.kz”.

Тегишли қонун ҳужжати Қозоғистон президенти Қосим-Жўмарт Тўқаев томонидан имзоланган.

Фавқулодда ҳолат 15 апрелга қадар давом этади.

Бу даврда республикада карантин жорий этилади, жамоат тартиби кучли назорат қилинади. Ўта муҳим давлат ва стратегик объектлар муҳофазаси кучайтирилади. Бундан ташқари, савдо марказлари, кинотеатрлар ва кўргазмалар фаолияти тўхтатилади, шунингдек, оммавий тадбирлар, хусусан, оилавий, хотира ва спорт билан боғлиқ тадбирлар тақиқланади.

Ҳозирда Қозоғистонда коронавирус юқтириб олганлар сони олти нафарни ташкил этади. 1090 киши касалхонага ётқизилган, 452 киши уй карантинида.

15 март, якшанба куни, соат 6:00 да Республика Вирусология институти лабораториясида Францияда бўлиб қайтган бир нафар Ўзбекистон фуқаросида COVID-19 коронавирус инфекцияси аниқланди.

Коронавирус билан касаллангани Ўзбекистонда аниқланган илк бемор — аёл киши, Тошкент шаҳридан. «Дарё» манбасининг маълум қилишича, у Францияда бир ҳафтадан ортиқ бўлиб, сўнг Ватанга қайтган. Аёл қайтган рейсда, бирламчи маълумотларга кўра, 48 йўловчи, шунингдек, экипаж аъзолари бўлган. Бемор аёл туфайли 150 киши изоляцияга олинди. Уларнинг тўққиз нафари аёлнинг оила аъзолари.

Аввалроқ коронавирус сабаб Ўзбекистондаги барча мактаблар, боғчалар ва ОТМлар карантинга ёпилиши ҳақида хабар берилган эди.