Коронавирус билан касаллангани Ўзбекистонда аниқланган илк бемор — аёл киши, Тошкент шаҳридан. «Дарё» манбасининг маълум қилишича, у Францияда бир ҳафтадан ортиқ бўлиб, сўнг Ватанга қайтган.
Манба аёлнинг айнан қачон Ўзбекистонга келганига аниқлик киритмади. Flightradar24 маълумотига кўра, Uzbekistan Airways Париждан Тошкентга сўнгги икки рейсни 10 ва 13 март кунлари амалга оширган.
14 мартдан бошлаб эса Ўзбекистонга коронавируснинг кириб келиши ва тарқалишининг олдини олиш чора-тадбирлар дастурини тайёрлаш бўйича республика махсус комиссиясининг 12 март куни бўлиб ўтган йиғилиши баёнига мувофиқ, Ўзбекистон Франция, Испания ва Буюк Британия билан авиақатновларни тўхтатганди.
Коронавирусга чалинган аёл қайтган рейсда, бирламчи маълумотларга кўра, 48 йўловчи, шунингдек, экипаж аъзолари бўлган. «Уларнинг барчаси изоляцияга олинмоқда», — деди манба.
Изоҳ (0)