Ўзбекистонда 15 март, якшанба куни, коронавирус билан касалланиш ҳолати қайд этилди. Санитария-эпидемиологик осойишталик агентлиги бемор 14 март куни Республика Вирусология илмий-тадқиқот институти клиникасига COVID-19 коронавирус инфекциясида гумон қилиниб, ётқизилгани ҳақида хабар берди.
Маълум қилинишича, бемор 28 февралдан 11 мартга қадар Францияда сайёҳатда бўлган. 11 март, чоршанба куни, соат 06:00 да Париж—Тошкент 252-рейси билан Тошкентга учиб келган. Аэропортда санитария-карантин пунктида термометрия ҳамда бирламчи тиббий текширувдан ўтказилган ва касаллик белгилари аниқланмаган. Шундан сўнг йўловчининг яшаш манзилига аниқлик киритилиб, у уй шароитида 14 кунлик тиббий кузатувга олинган.
Бироқ 13 март, жума куни, бемор томоғида қичишиш, тана ҳарорати кўтарилиши ҳамда йўтал билан шифохонага ётқизилган. Бемордан 14 март, шанба куни, коронавирус инфекциясига лаборатория таҳлили учун намуна олинган ва 15 март, якшанба куни соат 06:00да намуна жавобларига кўра, унда коронавирус инфекцияси аниқланган.
Самолётда бемор билан умумий ҳисобда 48 нафар йўловчи келган. Улардан 24 нафари транзит йўловчилар бўлиб, қолган 24 киши Ўзбекистонда қолган. Қолганларнинг 4 нафарини Франция, 1 нафарини Италия ва 1 нафарини Бразилия фуқаролари ташкил қилмоқда. Учиб келган фуқароларнинг яшаш манзили бўйича рўйхат шакллантирилиб, улар 14 кунлик карантин ўтказиш учун махсус тайёрланган муассасаларга жойлаштирилган.
Шунингдек, Ислом Каримов номидаги Тошкент халқаро аэропортида 11 март куни фаолият олиб борган 69 нафар чегара қўшинлари, божхона, аэропорт ходимининг рўйхати шакллантирилиб, улар ҳам махсус муассасаларда 14 кунлик тиббий кузатувга олинган. Беморнинг 10 нафар оила аъзолари тўлиқ текширувдан ўтказиш учун Вирусология илмий-тадқиқот институти клиникасига жойлаштирилган.
Хабар берилишича, бемор истиқомат қилувчи кўп қаватли уй ва бемор хонадонида дезинфекция ўтказилган. Шу билан бирга, мазкур кўп қаватли уйда яшовчи 230 нафар фуқаро рўйхати шакллантирилиб, тиббий кузатувга олинган.
Изоҳ (0)