Токио—2020 Олимпиадасига йўлланмани қўлга киритган фарғоналик боксчи Миразизбек Мирзаҳалиловга вилоят ҳокимлиги томонидан Nexia-3 автомобили совға қилинди. Бу ҳақда «Дарё» мухбири Азизжон Эрматов хабар бермоқда.
Фото: «Дарё»
3—11 март кунлари Иорданиянинг Амман шаҳрида ўтказилган Токио—2020 Олимпиадасига йўлланма берувчи лицензион мусобақада -57 килограмм вазн тоифасида иштирок этган Миразизбек Мирзаҳалилов олтин медални қўлга киритганди.
Маълумот учун, Миразизбек Мирзаҳалилов Президент фармони билан «Ўзбекистон ифтихори» унвони билан ҳам тақдирланган. У 2019 йилнинг 9—21 сентябрь кунлари Россиянинг Екатеринбург шаҳрида бўлиб ўтган бокс бўйича Жаҳон чемпионатида олтин медал олган. Шундан сўнг боксчига Президент совғаси сифатида Chevrolet Tracker, вилоят ҳокимлиги томонидан бўлса Фарғона шаҳри марказидан янги уй совға қилинганди.
Фото: «Дарё»
Қайд этиш жоиз, боксчи Токио—2020 Олимпиадасига йўлланмани қўлга киритиш орқали 100 миллион сўм мукофот пулига ҳам эга чиқди. Боиси аввалроқ Токиода ўтадиган ёзги Олимпиада ўйинлари йўлланмасини қўлга киритган спортчилар учун 100 миллион сўмдан мукофот пули берилиши эълон қилинганди.
