«Ҳазорасп» эркин иқтисодий зонасида умумий қиймати 306 миллион доллардан зиёд бўлган 19 лойиҳа амалга оширилмоқда. Бу ҳақда Президент матбуот хизмати хабар бермоқда.
Иқтисодий зона 2017 йил 12 январда ташкил қилинган, ўша йил октябрда Президент бу ерга келиб, тақдим этилган лойиҳалар бўйича топшириқлар берган эди. Қайд этишларича, ҳозирда зонада умумий қиймати 306 миллион доллардан зиёд бўлган, жумладан, 266 миллион доллардан ортиқ тўғридан-тўғри хорижий инвестициялар эвазига, умумий ҳисобда 19 та лойиҳа амалга оширилмоқда.
Уларда сендвич панеллар, ювиш воситалари, автомобиль радиаторлари, қурилиш материаллари, трикотаж маҳсулотлари, тиббиёт қўлқоплари, пойабзаллар ва бошқа товарлар ишлаб чиқарилмоқда. 1100 дан зиёд киши иш билан таъминланган. 2020 йилда «Ҳазорасп» эркин иқтисодий зонасида умумий қиймати 26 миллион доллардан зиёд яна 4 та корхона фойдаланишга топширилиши ҳамда 488 та иш ўрни яратилиши мўлжалланган.
Президент Шавкат Мирзиёев Хоразм вилоятига ташрифи доирасида 12 март куни ушбу эркин иқтисодий зонада бўлди, бу ерда январь ойида ишга тушган Develop Textile корхонаси фаолияти билан танишди. «Шу ерда Хоразм вилоятида амалга ошириладиган инвестиция лойиҳалари тақдимоти ўтказилди. Давлатимиз раҳбари улар юзасидан кўрсатмалар берди», — дейилади Президент матбуот хизмати ахборотида.
Изоҳ (0)