9 март куни соат 21:00 да «Янги Ангрен» иссиқлик электр станциясида энергоблокларга кўмир етказиб бериш тизимидаги носозлик туфайли ишлаб чиқариш қуввати 100 мВтга пасайиб кетди. Бу ҳақда Ўзбекистон МЕТ АЖ ахборот хизмати хабар берди.
Соат 21:17 да 200 мВт қувват билан ишлаётган 4-энергоблокка ёқилғи бериш тўхтаб қолганлиги туфайли авария ҳолатини олдини олиш мақсадида энергоблок станция ходимлари томонидан фавқулодда ўчирилган. Станциянинг умумий қуввати 800 мВтдан 420 мВтгача пасайиб кетган.
«Содир бўлган носозлик туфайли энергетика тизимида аварияга қарши автоматика ишлаши натижасида истеъмолчилар электр таъминотида узилишлар юз берди ва айни пайтда электр таъминотидаги мувозанат хавфсизлигини таъминлаш учун чекловлар киритилишига мажбур бўлинмоқда», — дейилади хабарда.
Миллий диспетчерлик маркази маълумотларига кўра, бундай ҳолат ушбу станцияда биринчи марта кузатилаётгани йўқ. Март ойининг 9 куни давомида оператив маълумотларга кўра, энергоблокларда 5 марта ўчиш ҳолатлари содир бўлган.
Таъкидланишича, юзага келган носозликлар ва унинг бартараф этилиши юзасидан батафсил маълумотлар «Иссиқлик электр станциялари» АЖнинг расмий веб-сайти ва ижтимоий тармоқдаги саҳифаларида эълон қилинади.
Эслатиб ўтамиз, жорий йилнинг январь ойи охирида «Янги Ангрен» ИЭСда ёнғин юз берган эди.
Изоҳ (0)