АҚШ биржаларидаги савдолар 7 фоизлик пасайиш сабабли тўхтатилди

АҚШ биржаларида савдолар котировкаларнинг пасайиши билан бошланди. Савдолар бошланганидан сўнг S&P 500 индекси 7 фоизга тушиб кетди, бу савдо режимининг 15 дақиқага тўхтатиб қўйилишига сабаб бўлди. Бу вақт ичида Dow Jones индекси 7,29 фоиз йўқотишга учради, NASDAQ Composite котировкаси эса 6,86 фоизга пасайди. Бу ҳақда «РБК» хабар берди.

Қайд этилишича, АҚШ биржаларида кетма-кет учинчи кун пасайиш кузатилмоқда. Уч кун давомида Dow Jones савдоларни тўхтатиш пайтида унинг кўрсаткичлари 11,48 фоизга пасайди. NASDAQ эса уч кун ичида 11,43 фоиз йўқотишга учради.

Бозорлардаги савдолар коронавирус тарқалиши ва ОПЕК+ мамлакатларининг нефть қазиб олишни чеклаш бўйича келишувга эриша олмагани сабабли пасаймоқда. Бугунги савдо давомида Brent маркасидаги нефть нархи 30,9 фоизга пасайиб, бир баррель учун 31,27 долларни ташкил қилди.

Савдолар пасайиши бўйича пешқадамлар нефть компанияларининг акциялари бўлди: Occidental Petroleum’нинг акциялари 43 фоизга, ConocoPhillips’нинг қимматли қоғозлари 30 фоизга арзонлашган. Exxon Mobile’нинг нархи 8,9 фоизга пасайди, Chevron акциялари 10,6 фоиз, Baker Hughes акциялари эса 15 фоиз йўқотишга учради.

Индексларнинг пасайиши Осиё ва Европа бозорларида ҳам кузатилди. Япониянинг Nikkei биржаси индекси 5,07 фоизга тушди, Гонконгнинг Hang Seng биржаси индекси эса 4,23 фоизга пасайди. Германиянинг DAX биржасида 7,83 фоиз, Буюк Британиянинг FTSE биржасида эса 8,4 фоиз пасайиш кузатилди.

Эслатиб ўтамиз, ОПЕК+ мамлакатлари нефть қазиб олишни қисқартириш юзасидан бир қарорга кела олмагани ҳақида тарқалган хабарлардан кейин нефть нархи дастлаб 4 долларга пасайган эди. 9 март кунги очиқ савдоларда Brent маркасидаги нефть нархи бирданига 20 фоизга пасайиб, 38 долларни ташкил этди. Россияда эса доллар ва евро кескин қимматлашди. Goldman Sachs нефть нархи бир баррель учун 20 долларга тушиб кетиши мумкинлигини маълум қилди. Кун давомида нефть нархининг пасайиши тезлашиб, Brent маркасидаги нефтнинг нархи аввалги минимумидан ўтиб, бир баррели учун 31,38 долларгача тушиб кетди. Saudi Aramco нефть компанияси акциялари 10 фоизга пасайди.