Коронавирус сабабли 2020 йилда Таиландга ташриф буюрадиган хорижлик сайёҳлар сони олти миллион кишига камайиши мумкин. Бу ҳақда Таиланд туризм бошқармасига таяниб, «РБК» хабар берди.
Маълум қилинишича, мамлакат учун бу сўнгги тўрт йилдаги энг паст кўрсаткич бўлади. Сайёҳлар сони 2020 йилда 33,8 миллион кишини ташкил этиши кутилмоқда. 2019 йилда мазкур мамлакатга 39,6 миллион хорижлик ташриф буюрган.
Таиланд туризм бошқармаси раҳбарининг қайд этишича, февраль ойида сайёҳлар сони 40 фоизга камайган, баҳорда эса вазият янада ёмонлашади.
Таиландда 1 март, якшанба куни, коронавирус билан боғлиқ биринчи ўлим ҳолати қайд этилган. Мамлакатда вирусни юқтириш билан боғлиқ 43 та ҳолат аниқланган.
Сўнгги маълумотларга кўра, бутун дунё бўйлаб коронавирус билан касалланганлар сони 88 минг кишидан ошиб кетди. Арманистонда ҳамда Россия пойтахти Москва шаҳрида коронавирус юқтириб олиш бўйича биринчи ҳолат, Австралияда коронавирус билан боғлиқ биринчи ўлим ҳолати қайд этилди. АҚШда коронавирусдан иккинчи киши вафот этди. Emirates Airlines компанияси коронавирус сабаб ходимларидан таътилга чиқишни сўради.
Хитой Соғлиқни сақлаш миллий комиссиясининг маълумотларига кўра, Хитойда сўнгги бир сутка ичида 42 та ўлим ҳолати қайд этилган бўлиб, яна 202 кишида коронавирус аниқланган. Мамлакатда умумий ҳисобда касалланганлар сони 80 026 кишига етди.
Изоҳ (0)