Фарғона вилояти ИИБ ЙҲХБ томонидан 2 та Tracker ва Lacetti русумли хизмат автомашиналарига интернет тарқатувчи қурилма ва белгилар ўрнатилди. Эндиликда ҳар қандай фуқаро улардан бепул фойдаланиши мумкин. Бу ҳақда ИИВ ЙҲХББ ахборот хизмати хабар берди.
Қайд этилишича, Республикада илк бор Фарғонада жорий қилинган бу янгилик, ёшлар ўртасида китобхонликни ривожлантириш, уларнинг электрон ахборотларга бўлган эҳтиёжини қондиришга қаратилган.
«Патрул зиё маскани» дея ном берилган лойиҳадан самарали фойдаланиш учун, фуқаролар хизмат автомашиналари ёнида шахсий уяли алоқа воситаларининг Wi-Fi тизимини ёқишади ва ундаги «Патрул зиё маскани» тармоғига уланишади. Автомашина сиртидаги махсус QR-коди орқали «ZiyoNet» таълим порталининг кутубхона базасига тўғридан-тўғри уланади.
Бундан ташқари унда «TAS-IX» тизимидаги бошқа сайтлардан ҳам фойдаланиш мумкин.
Изоҳ (0)