Тошкент ҳокимлиги матбуот хизмати раҳбари — ҳокимнинг ахборот сиёсати бўйича маслаҳатчиси лавозимига Фурқат Сидиқхўжаевич Маҳмудхўжаев тайинланди, дея хабар қилган Тошкент шаҳар ҳокимлиги матбуот хизмати.
Маҳмудхўжаев тайинловга қадар Фуқароларнинг ўзини ўзи бошқариш органлари фаолиятини мувофиқлаштириш бўйича Тошкент шаҳар кенгаши раиси лавозимида фаолият кўрсатган.
1965 йилда туғилган Фурқат Маҳмудхўжаев 1989 йилда Тошкент давлат техника университетини муҳандис-технолог мутахассислиги бўйича ҳамда Тошкент кимё технология институти аспирантурасини тамомлаган (1989 — 1991 йиллар). Ўзбекистон ёшлар иттифоқи Миробод туман қўмитасининг биринчи котиби (1996−2001 йиллар), «Камолот»нинг Тошкент шаҳар бўлими раиси (2001−2006 йиллар), Таэквон-до ITF миллий ассоциацияси вице-президенти (2006−2008 йиллар), «Пойтахт Жамоли" Халқаро бизнес маркази корхонаси директори (2007−2009 йиллар) лавозимларида ишлаган.
Бундан ташқари, у «Ўзбекнаво» эстрада бирлашмаси бош мутахассиси, бўлим бошлиғи (2009−2010 йиллар), «Ўзбекнаво» бош директорининг ўринбосари (2010−2012 йиллар), «Маҳалла» жамғармаси Тошкент шаҳар бўлими раисининг ўринбосари (2012−2013 йиллар), Тошкент шаҳар ҳокимлиги ҳузуридаги Маънавият ва маърифат маркази раҳбари (2013−2017 йиллар), Вазирлар Маҳкамасининг маданият, санъат ва ёшлар сиёсати бўйича ахборот-таҳлил департаменти етакчи мутахассиси (2017−2018 йиллар) лавозимларида фаолият кўрсатган.
Эслатиб ўтамиз, 2018 йил февралидан 2019 йил апрелигача Тошкент шаҳар ҳокимлиги матбуот хизматига Ҳусниддин Эргашев раҳбарлик қилди. У МТРКга қайтиб «Ёшлар» телерадиоканалида иш бошлаганидан буён ушбу лавозим вакант бўлиб қолаётган эди.
Тошкент ҳокимлиги матбуот хизмати раҳбари — ҳокимнинг ахборот сиёсати бўйича маслаҳатчиси, шунингдек унинг матбуот котиби ҳам ҳисобланади.
Изоҳ (0)