Коронавирус тўлқини Евроиттифоқ иқтисодиётига таъсир кўрсатади. Бу ҳақда инқирозга қарши кураш бўйича еврокомиссар Янез Ленарчич маълум қилди, деб хабар бермоқда «РБК».
Ленарчичнинг маълум қилишича, коронавирус билан курашиш учун Европа иттифоқи 232 миллион евро ажратади. Касаллик қурбонларининг сони 2,6 минг кишидан ошиб кетгани барча даражаларда унга қарши курашишдан бошқа чора йўқ эканлигини кўрсатмоқда.
Унинг сўзларига кўра, маблағларнинг бир қисми Жаҳон соғлиқни сақлаш ташкилотига йўналтирилади, яна бир қисми эса соғлиқни сақлаш тизими камроқ ривожланган давлатларни қўллаб-қувватлаш учун ажратилади.
Қайд этилишича, 114 миллион евро Жаҳон соғлиқни сақлаш ташкилотига ажратилади. 100 миллион евро эпидемиология, ташхис, терапия ва даволаш соҳаларидаги тадқиқотларга кетади. 15 миллион евро Африка мамлакатларига берилади. Яна 3 миллион евро вирус тарқалишининг маркази бўлган Хитойнинг Ухань шаҳридан одамларни эвакуация қилиш учун сарфланади.
Аввалроқ, АҚШ коронавирус қайд этилган Хитой ва бошқа мамлакатларга 100 миллион доллар ажратиши маълум қилинган эди. Хитой Молия вазирлиги эса коронавирусга қарши курашиш учун қарийб 3,9 миллиард доллар миқдорида маблағ ажратди. Қозоғистон эса мазкур вирус билан курашиш учун 9,2 миллиом доллар маблағ ажратганини маълум қилди.
Шунингдек, Билл Гейтс Хитойдаги коронавирус билан курашишга 5 миллион доллар ажратди. Dell, PepsiCo ва Microsoft Хитойда коронавирусга қарши курашишда ёрдам беришини маълум қилди. Хитойлик актёр Жеки Чан коронавирусга қарши вакцина яратган инсонга 143 минг доллар ваъда қилди.
Изоҳ (0)