Президент Шавкат Мирзиёев 24 февраль, душанба куни, кимё саноатини ислоҳ қилиш бўйича истиқболли режалар ҳамда 2020 йилда амалга ошириладиган асосий вазифалар муҳокамасига бағишланган йиғилиш ўтказди.
Шавкат Мирзиёев 2020 йил январь ойида парламентга йўллаган Мурожаатномасида ва Олий Мажлис палаталари қўшма мажлисида кимё соҳасига алоҳида эътибор қаратиб, ҳукумат олдига соҳани модернизация қилиш, илм-фан ва инновацияларни кенг жорий этиш бўйича қатор вазифалар қўйган эди.
«Бу бежиз эмас. Чунки мазкур тармоқда муаммолар, ҳали фойдаланилмаётган имкониятлар кўп. Жумладан, юртимизда ишлаб чиқариш мумкин бўлган, мураккаб таркибга эга бўлмаган кимё маҳсулотлари четдан олиб келинмоқда», — дейилади Президент матбуот хизмати ахборотида.
Таъкидланишича, экспорт структураси диверсификация қилинмаган, бунда ҳанузгача минерал ўғитлар улуши жуда катта. Ишлатилаётган ускуналар 60 фоиз эскирган, энергия сарфи меъёрдан 2-3 баравар ортиқ. Йиғилишда соҳани ислоҳ қилиш, салоҳиятини ошириш бўйича вазифалар белгиланган.
Тармоқдаги ҳар бир корхона фаолияти танқидий таҳлил қилиниб, маҳсулотлар сифатини ошириш, энергия сарфини камайтириш ҳисобига таннархни пасайтириш бўйича топшириқлар берилган. Рақамли технологияларни қўллаш, инсон ҳаёти учун хавфли жараёнларда автоматизация даражасини кўтариш муҳимлиги қайд этилган.
Кимё соҳасида янги йўналишларни ривожлантириш, бунга хорижий инвесторларни кенг жалб қилиш зарурлиги таъкидланган. Тўқимачилик, қурилиш материаллари, автомобилсозлик, истеъмол товарлари, озиқ-овқат ва фармацевтика учун зарур хом ашё ишлаб чиқариш масалаларига алоҳида эътибор қаратилган.
«Навоийазот»да поливинилхлорид ишлаб чиқаришни тез муддатда лойиҳа қувватига олиб чиқиш ҳамда иккинчи босқичини лойиҳалаштириш бўйича кўрсатмалар берилган. «Фарғонаазот», Қўнғирот сода заводи ва Деҳқонобод калийли ўғитлар заводида давлат улушини инвесторларга сотиш масалаларига ҳам тўхталиб ўтилган.
Кичик тоннажли кимё маҳсулотлари ишлаб чиқаришни кенгайтириш, шу мақсадда «Навоийазот»да бўш турган майдонлар негизида ихтисослашган кичик саноат зонаси ташкил қилиш зарурлиги ҳам қайд этилган.
Изоҳ (0)