«Юнус Ражабий» маҳалласида жойлашган уйлар орасидаги майдонда мавжуд кўп йиллик 81 та дарахтнинг қонунга хилоф равишда кесилганлиги ҳолати бўйича тўпланган ҳужжатлар Тошкент шаҳар прокуратураси томонидан ўрганиб чиқилди, деб хабар бермоқда прокуратура матбуот хизмати. «Davletovuz» Telegram-каналининг ёзишича, ноқонуний кесилган дарахтлар масаласи жиддий тус олиб, мамлакат раҳбарияти томонидан қонунбузарларга нисбатан аёвсиз чора кўриш топширилган.
Тошкент шаҳар прокуратураси маълумотига кўра, Тошкент шаҳар ҳокимининг 2018 йил 18 апрелдаги 608-сонли қарорига асосан, «Building And Suppliyes» МЧЖга «Юнус Ражабий» маҳалласи 72, 66/1, 66/2 ва 66/4-уйлар оралиғида 0,5 гектар ер майдони кўп қаватли турар жой биноларини қуриш учун доимий фойдаланишга ажратиб берилган.
Қарор шаҳарсозлик қоидаларига зид бўлгани учун шаҳар прокурори томонидан 2018 йил 4 июлда протест келтирилган. Шаҳар ҳокимининг 2018 йил 17 июлдаги 1053-сонли қарорига кўра, протест қаноатлантирилган ва 608-сонли қарор бекор қилинган.
Бу ҳолатдан норози бўлган «Building And Suppliyes» МЧЖ ҳудудий маъмурий судга ариза берган. Бектемир тумани маъмурий суди 2018 йил 12 ноябрдаги қарори билан шаҳар ҳокимининг 1053-сонли қарорини ҳақиқий эмас деб топган. «Юнус Ражабий» маҳалласида яшовчи аҳолининг шаҳар ҳокимининг 608-сонли қарорини ҳақиқий эмас деб топиш тўғрисидаги Чилонзор тумани маъмурий судига киритган аризаси, суд томонидан 2019 йил 11 декабрда рад қилинган. Ушбу суд қарори 2020 йил 27 январда Тошкент шаҳар маъмурий суди апелляция инстанциясида кўрилган ва ўзгаришсиз қолдирилган.
Маълум бўлишича, «Building And Suppliyes» МЧЖ томонидан унга ажратилган ер майдонидаги кўп йиллик 81 та дарахтлар қонунга зид равишда кесилганлиги оқибатида ўсимлик дунёсига 630,4 миллион сўм моддий зарар етказилган.
Мазкур ҳолат юзасидан Тошкент шаҳар прокуратураси томонидан 2020 йил 22 февралда Жиноят кодексининг 205-моддаси 2-қисми «а» банди ва 198-моддаси 2-қисми билан Яккасарой тумани ҳокимлиги ва «Building And Suppliyes» МЧЖ мансабдор шахсларига нисбатан жиноят иши қўзғатилган. Жиноят кодексининг 198-моддаси 4-қисмига кўра, етказилган моддий зарар уч карра миқдорида қопланган тақдирда, озодликни чеклаш ва озодликдан маҳрум қилиш тариқасидаги жазо қўлланилмайди.
Дастлабки терговда 2 нафар айбланувчидан 1 миллиард 891,3 миллион сўм моддий зарар ундирилди ва уларга нисбатан гаров эҳтиёт чораси қўлланилган.«Юнус Ражабий» маҳалласи ҳудудида ноқонуний кесилган дов-дарахтлар ер майдони тезкорлик билан тозаланиб «Липа», «Берёза», «Каштан» ва «Павлония» дарахтлари экилиши ташкил қилинди.
Жиноят иши бўйича дастлабки тергов ҳаракатлари шаҳар прокуратураси томонидан олиб борилмоқда.
Изоҳ (0)