Фарғонада тез ёрдамнинг аёл шифокорини алдаб, уйига олиб кирмоқчи бўлган шахсга жиноий иш қўзғатилди
Фарғонанинг Қува туманида тез тиббий ёрдам бўлими ходимлари тажовузга учрагани юзасидан жиноий иш қўзғатилди. Бу ҳақда «Xabar.uz» маълум қилди.
Қайд этилишича, воқеа 2019 йил 29 ноябрда кундузи содир бўлган. Қува тумани тез тиббий ёрдам бўлимига 54 ёшли Ю.О. исмли шахс келиб, хотинининг мазаси қочгани, зудликда ёрдам кўрсатиш кераклигини айтган.
Айтилган манзилга борилгач, уй қулф экани шифокор ва ҳайдовчида шубҳа туғдирган. Шунга қарамай Ю.О. аёл шифокорни ичкарига ёлғиз кириши, ҳайдовчидан эса машинадан тушмасликни талаб қилган. Мақсадига етмагач, ҳеч бир сабабсиз ҳайдовчини ҳақорат қилиб, уни тош билан уриб, жароҳат етказган ва тез ёрдам машинасининг ойналарини синдирган.
Мазкур ҳолат бўйича суриштирув ишлари олиб борилиб, Ю.О.га нисбатан маъмурий жавобгарликка оид иш қўзғатилган, бироқ Қува туман маъмурий суди Ю.О. хатти-ҳаракатларида жиноят аломатлари мавжуд, деган хулоса билан ишни прокуратурага оширган.
Хабарда айтилишича, ҳолат юзасидан қўшимча суриштирув ўтказилиб, Ю.О. нисбатан Жиноят кодексининг 277-моддаси 1-қисми (Безорилик) билан жиноят иши қўзғатилди.
Ушбу моддага кўра, безорлик жиноятини содир этганликда айбдор деб топилган шахс базавий ҳисоблаш миқдорининг 50 бараваридан 100 бараваригача миқдорда жарима ёки 300 соатгача мажбурий жамоат ишлари ёхуд 3 йилгача ахлоқ тузатиш ишлари билан жазоланиши мумкин.
