Касалланганлар ва вафот этганлар
Хитой Соғлиқни сақлаш минтақавий комиссияси Хубэй провинциясида COVID-19 коронавируси оқибатида вафот этганлар сони 2004 кишига етгани ҳақида хабар берди. Бутун дунё бўйлаб коронавирус келтириб чиқарган пневмония оқибатида 2009 киши вафот этди. Вафот этганларнинг 1921 нафари Хубэй провинцияси ҳисобига тўғри келмоқда.
COVID-19 коронавирусини юқтириб олганлар сони 74 185 кишидан ошиб кетди. Таъкидланишича, 14 376 киши даволанишга муваффақ бўлган, яна 5,2 минг киши шифохоналарда назорат остида.
Ўзбекистондаги вазият
Хитой раҳбари Си Цзиньпин мазкур мамлакат халқига ҳамдардлик ва кўрсатилган ёрдам учун Ўзбекистон Президенти Шавкат Мирзиёевга миннатдорлик билдирди. Ўзбекистон 12 февраль, чоршанба куни, Хитойга коронавирусга қарши курашиш учун гуманитар ёрдам юборган эди.
Соғлиқни сақлаш вазирлиги хабар беришича, 18 февраль, сешанба куни, «Бўстон» санаторийсига жойлаштирилган 294 нафар фуқаронинг карантин муддати якунига етиши муносабати билан уйига кузатилган. Шунингдек, 19 февраль, чоршанба куни, яна 84 нафар ўзбекистонлик карантин муддати якунига етиши муносабати билан уйига кузатилди. Уларнинг бирортасида коронавирус инфекцияси аниқланмаган. Кузатиш маросимида иштирок этган «Xabar.uz» мухбири карантин муддатидан чиққан фуқаролар, шифокор ва ҳамширалар билан суҳбат қилибди.
19 февраль, чоршанба куни, биринчи Тошкент халқаро инвестиция форуми коронавирус сабабли қолдирилгани маълум бўлди. 5—6 март кунлари ўтказилиши режалаштирилган форум кузгача қолдирилган. Инвестициялар ва ташқи савдо маълумотларига кўра, форумда 1500 нафардан ортиқ хорижий ва маҳаллий компания раҳбарлари, инвесторлар, экспортчилар ва халқаро ОАВ вакилларининг иштирок этиши режалаштирилганди.
Жаҳондаги вазият
Коронавирус сабаб Хитойда тиббий ниқоблар тақчиллиги кузатилмоқда. Шу сабаб Хитой Туркманистондан умумий қиймати 200 минг доллар бўлган бир миллионта тиббий ниқоб сотиб олди. Аввалроқ ЖССТ коронавирус туфайли тиббиёт ниқобларига талаб 100 баравар ошишини тахмин қилган эди.
Хитойнинг учта авиакомпанияси коронавирус сабабли 2020 йил 20 январдан 13 февралгача 78 мингта рейсни бекор қилди ва 13 миллион чиптани қайтариб олди.
Россия бош вазири Михаил Мишустин Хитой фуқароларининг мамлакат ҳудудига киришини вақтинча тақиқловчи фармойишни имзолади. Фармойиш 20 февраль, пайшанба кунидан бошлаб кучга киради. Ҳужжатда туризм саёҳатлари, хизмат ва таълим, шунингдек, шахсий мақсадларни кўзлаб Россияга келаётган хитойликларга мамлакат ҳудудига киришига вақтинча тақиқ қўйиш масаласи кўтарилган. Хитой фуқаролари мамлакатга кириши ман этилгани ортидан Россия турбизнеси миллиардлаб рубль зарар кўриши маълум қилинди. Россия турбизнесининг кўрадиган зарари февраль март ойларининг ўзида 2,8 миллиард рублни ташкил этиши мумкин.
Россиянинг Санкт-Петербург шаҳридаги Боткин номидаги шаҳар клиник шифохонасининг бош шифокори Алексей Яковлевни ишдан бўшатди. Февраль ойининг бошида мазкур шифохонага Хитойдан қайтган бир нечта россиялик фуқаро мажбурий тартибда карантинга жойлаштирилиб, уларнинг тўрт нафари ўзбошимчалик билан муассасадан кетиб қолгани ҳақида хабар берилганди.
Apple корпорацияси ўз инвесторларини коронавирус тарқалгани туфайли Хитойдаги корхоналари ишини тўхтатгани учун смартфонлар етказиб беришни чеклашга мажбур бўлгани ҳақида огоҳлантирди. Apple инвесторларни жаҳон бозорларида iPhone танқислиги ва Хитойда савдонинг пасайиши корпорация жорий чоракда эълон қилинган даромад кўрсаткичларига эриша олмаслиги мумкинлини маълум қилди.
Хитойда тарқалган коронавирус сабаб мамлакат ҳудудидаги заводлар ва дўконлар ёпиб қўйилган, бу эса бутун дунёда 5 миллиондан ортиқ компаниялар фаолиятига салбий таъсир кўрсатди. Бироқ таҳлилчилар коронавируснинг дунё бизнеси ва иқтисодиётига таъсири ҳақида реал хулосалар чиқариш ҳозирча мушкул эканини қайд этмоқда.
Хитойнинг Ухань шаҳрига келиб қолган 21 ёшли канадалик Кристина Шрамко мушугини ёлғиз қолдиришни истамагани учун карантин сабаб ёпиб қўйилган ҳудудда қолиб кетди. Кристина Шрамко YouTube’да блог юритиб, фожиавий машҳурликка эришган Ухандаги ҳолат ҳақида сўзлаб келмоқда. Икки ҳафта олдин коронавирусга бағишлаб чиқарган ролигида у Ухань арвоҳ-шаҳарга айланиб қолганини айтган: «Уйимнинг рўпарасида улкан савдо маркази бор, у ердаги тураргоҳлар автомобиллар билан тўлган, одамлар тўда бўлиб кириб, худди шундай чиқиб келарди. Ҳозир деярли ҳеч ким йўқ, савдо маркази атрофидаги ҳудудлар бўшаб қолган».
Уханда вақтинча очилган шифохоналардан бирининг раҳбари COVID19 коронавируси келтириб чиқарган касаллик оқибатида вафот этди. Бу ҳақда «Жэньминь Жибао» хабар берган. «Учан» касалхонаси директори Лю Чжимин 17 февраль, душанба куни COVID19 коронавируси билан касалланиш оқибатида вафот этди. У коронавирусдан ўлим топган биринчи тиббиёт муассасаси раҳбари», — дея ёзган нашр. Бироқ Daily Mail нашрининг ёзишича, кейинроқ газета ушбу хабарни ўз расмий сайтидан ўчириб ташлаган.
Изоҳ (0)