2020 йилнинг 19—20 февраль кунлари Тошкентда бўлиб ўтадиган Uzbekistan Airports, Aviation & Logistics Forum Биринчи халқаро авиация форуми 19 февраль, чоршанба куни иш бошлади. Бу ҳақда «Дарё» мухбири хабар берди.
Туризмни ривожлантириш давлат қўмитаси, Транспорт вазирлиги, «Ўзбекистон ҳаво йўллари» МАК, Uzbekistan Airports АЖ ҳамда БААнинг Fair Exhibition Organisers компанияси ҳамкорлигида ташкил этилган мазкур йирик тадбирнинг очилиш қисмида бош вазир ўринбосари, Туризмни ривожлантириш давлат қўмитаси раиси Азиз Абдуҳакимов нутқ сўзлади.
Ҳукумат расмийсининг таъкидлашича, хорижий авиакомпанияларни жалб қилиш доирасида сўнгги уч йилда Ўзбекистонга қатновларни амалга оширувчи хорижий авиакомпаниялар сони 15 тадан 23 тага етди.
«2019 йилда Ўзбекистонга ташриф буюрган хорижий туристлар сони 6 миллион 700 минг кишини ташкил этди. Бу 2016 йилдаги кўрсаткичга нисбатан 5 баробар кўп бўлиб, уч йил аввал сайёҳлар сони 1 миллион 300 минг киши эди. 2025 йилга келиб, юртимизга ҳар йили 12 миллиондан зиёд киши ташриф буюришини кутмоқдамиз.
Ўзбекистон бугунги кунда чартер рейсларга энг катта субсидия тақдим этмоқда. Айтайлик, юқори туристик мавсумда 300 киши ташиладиган бўлса, давлат томонидан ҳар бир рейсга 6 минг доллар миқдорида компенсация тақдим этилади. Бошқача қилиб айтганда, ҳар бир авиайўловчи учун 20 доллардан тўғри келади. 15 ноябрдан 15 февралга қадар давом этувчи, оқим паст бўладиган мавсумда 300 ўринга мўлжалланган самолёт Ўзбекистонга хорижий меҳмонларни олиб келса, бу миқдор 15 минг долларгача ошади. Ўйлайманки, бу субсидия миқдори кўплаб авиаташувчиларда катта қизиқиш уйғотади», — деди Абдуҳакимов.
Қайд этиш жоиз, мазкур форумда Буюк Британия, Германия, Франция, Канада, Ҳиндистон, Бразилия, Туркия, Кувайт, Миср, Россия, Хитой, Жанубий Корея каби қатор давлатлардан 60 дан зиёд экспонент, 300 делегат ва 1 минг 200 мутахассис, хусусан, хорижий мамлакатларнинг транспорт вазирликлари раҳбарлари, фуқаро авиацияси ва аэропортлар бошқаруви вакиллари, етакчи халқаро ва хорижий авиакомпаниялар, аэропортлар, авиация ҳамда транспорт соҳасидаги компанияларнинг юқори лавозимли расмийлари қатнашмоқда.
Изоҳ (0)