Хубэйда коронавирус оқибатида вафот этганлар сони 1,8 минг кишига яқинлашди

Хитойнинг Хубэй провинциясида COVID-19 коронавируси оқибатида вафот этганлар сони 1789 кишига етди. Бу ҳақда Соғлиқни сақлаш минтақавий комиссияси хабар берди.

Маълумотларга кўра, 17 февраль куни коронавирус оқибатида 1807 кишида пневмония аниқланган бўлиб, уларнинг аксарияти Ухань шаҳридан.

Ўтган бир сутка давомида коронавирус оқибатида 93 киши вафот этган. Касалликдан даволанган 1223 кишига тиббиёт муассасаларидан жавоб берилган.

Хубэй провинциясида вирусни юқтириб олганлар сони жами 59 989 кишини ташкил этмоқда, даволанишга муваффақ бўлганлар эса 7862 кишига етди. Ҳозирда 41 957 киши мутахассислар назорати остида бўлиб, улардан 9117 нафарини аҳволи оғир эканлиги айтилмоқда.

Аввалроқ Хитойда коронавирусни юқтириб олганини яширганларга ўлим жазоси қўлланилиши маълум қилинган эди. Инфекциянинг тарқалишига йўл қўйган шахс жамоат хавфсизлигига таҳдидни келтириб чиқаришда айбланиши мумкин. Си Цзиньпин эса коронавирус эпидемияси бошланганидан бери қандай чоралар кўрганини маълум қилди.