Японияда яшовчи Титэцу Ватанабэ кекса инсонлар орасидаги энг узоқ умр кўраётган эркак сифатида эътироф қилинди. Бу ҳақда «Гиннесс рекордлар китоби» сайтида хабар берилган.
«Гиннесс рекордлар китоби» вакиллари айни вақтда 112 йилу 345 кунлик Ватанабэни геронтолог тадқиқотчилар гуруҳи ўтказган текширувдан кейин ер юзидаги энг кекса эркак деб топган.
Отахон журналистлар билан суҳбатда узоқ яшаш сирларини ошкор қилди. У кўпроқ табассум қилиш ва бўлар-бўлмас нарсага асабийлашмаслик зарурлигини таъкидлади.
Ватанабэ 1907 йил 5 мартда Нииагата префектурасининг Зёэцу шаҳрида фермерлар оиласида туғилган. У қишлоқ хўжалиги билим юртини тугатганидан сўнг Тайванга кетган ва у ерда шакарқамиш йиғиш билан шуғулланувчи компанияда ишлаган. 18 йил давомида ушбу оролда яшаган Ватанабэ бу ерда уйланган, оила қурганидан кейин тўрт нафар фарзанд кўрган, бир неча йиллардан кейин бешинчи боласи ҳам туғилган.
Маълум вақт давомида ҳарбий хизматни ҳам ўтаган, Иккинчи жаҳон уруши даврида Тинч океанидаги ҳарбий ҳаракатларда иштирок этган. Уруш тугагач, Ватанабэ ҳам юртига қайтган. Рафиқаси урушдан кейин Японияда нон топиш жуда қийин иш бўлганини айтарди. Шунга қарамай эр-хотин омон қолиб, беш нафар фарзандни бирга улғайтирган.
Ватанабэ 1974 йилда нафақага чиққан. Ўғли билан бирга шаҳар ташқарисида уй-жой қилиб, у ердаги экин майдончасида катрошка, помидор каби полиз экинлари ҳамда қулупнай ва олхўри сингари меваларни етиштирган. Шунингдек, у 100 дан ортиқ бонсай дарахтларининг ниҳолларини эккан.
У айни вақтда қариялар уйида ҳаёт кечиради. Соғлиғидаги муаммолар туфайли фаол ҳаёт тарзини олиб бора олмайди. 2019 йил ёзига қадар ҳар куни жисмоний машқлар бажариш билан бирга каллиграфия ва оригами амалиётини ўтказар, математик масалаларни ечар эди.
Расмий маълумотларга кўра, айни пайтда япониялик Дзироэмон Кимура (116 ёшу 54 кунлик) дунёдаги энг кекса эркак ҳисобланади.
Япониялик Канэ Танака эса энг кекса аёл, у 117 ёшдан ошган. Аёлнинг ёши расман ҳужжатлар билан тасдиқланган.
Бутун дунёда тан олинган узоқ умр кўриш бўйича рекорд франциялик Жанне Кальманга тегишли, у 1997 йилда 122 ёшу 164 кунлик вақтида вафот этган. Айрим тадқиқотчилар унинг ёши борасида шубҳалар борлигини билдириб келади.
Изоҳ (0)