«Барселона» футбол клуби шаҳар аҳолисининг 2,65 фоизини иш билан таъминлайди ва Каталонияга йилига 1,4 млрд евро келтиради

PricewaterhouseCoopers консалтинг компанияси «Барселона» футбол клубининг Каталония иқтисодиётига таъсири ҳақида ҳисобот тайёрлади.

2018 йилнинг июлидан 2019 йил июнига қадар клуб Барселона шаҳрига 1 миллиард 190 миллион евро даромад келтирган, бу шаҳар ялпи ички маҳсулотининг (ЯИМ) 1,46 фоизини ташкил этади. Шунингдек, клуб 19 451 ишчи ўрни яратган, бу эса шаҳар банд аҳолисининг 2,65 фоизига тўғри келади.

«Барселона» шаҳар бюджетига 366 миллион евро ажратган, бу Барселона шаҳар кенгаши бюджетининг 13,8 фоизига тенг.

Шунингдек, клуб Каталония ҳудуди иқтисодиётига ҳам сезиларли таъсир ўтказади. «Барселона» Каталонияга 1 миллиард 394 миллион евро (Каталония ЯИМнинг 0,57 фоизи) олиб келди ва 32 531 ишчи ўрни яратди (Каталониядаги барча иш ўринларининг 0,69 фоизи).

2014/15 йилги мавсумдан бери клубнинг Барселона ЯИМга таъсири 31 фоизга ошди, ишчи ўринларига таъсири эса — 17 фоизга.