ЖССТнинг Европа минтақавий бюроси директори ўзининг биринчи хорижий ташрифини Ўзбекистондан бошлади
11 февраль, сешанба куни, Жаҳон соғлиқни сақлаш ташкилотининг Европа бюроси директори Ханс Клюге бошчилигидаги делегация Ўзбекистонга ташриф буюрди. Соғлиқни сақлаш вазирлигида делегация вакиллари билан учрашув ташкил этилди. Бу ҳақда «Дарё» мухбири Миролим Исажонов хабар бермоқда.
Тадбирда ССВ ва ЖССТнинг Европа минтақавий бюроси билан 2020—2021 йилларга мўлжалланган 2 йиллик ҳамкорлик тўғрисидаги битим имзоланди.
Учрашувда таъкидланишича, Ханс Клюге бюро раҳбари лавозимига 2019 йилнинг сентябрь ойида сайланган бўлиб, 2020 йилнинг 1 февралидан ўз вазифасига расман киришган. У ўзининг биринчи хорижий ташрифини Ўзбекистондан бошлади.
24 йилдан бери тиббиёт соҳасида фаолият юритиб келаётган Ханс Клюге дастлаб Бельгияда оилавий шифокор сифатида меҳнат қилган. Кейинчалик Сомали ва Либерияда «Чегара билмас шифокорлар» билан ҳамкорликда ишлаган. Доктор Клюге Россиядаги жазони ижро этиш тизимида сил касаллигига қарши кенг кўламли дастурларда фаол иштирок этган. Ҳатто 20 йил аввал Қорақалпоғистон Республикасида сил касаллигига қарши кураш йўналишида ҳам фаолият юритган. Клюге ЖССТнинг Жануби-шарқий Осиё минтақавий бюросида сил, ОИТС ва безгакка қарши кураш дастурларини ҳам назорат қилди. Охирги ўн йил мобайнида эса ЖССТнинг Европа минтақавий идорасида ишлаб, бу ерда соғлиқни сақлаш тизимидаги катта ўзгаришларда фаол иштирок этган.
Тадбирда сўзга чиққан доктор Клюге ЖССТ Ўзбекистонда соғлиқни сақлаш соҳасида олиб борилаётган ислоҳотлардан мамнун экани ва истиқболли лойиҳалар ҳақида ўз фикр-мулоҳазаларини билдирди. Учрашув давомида тиббий таълим ва фан соҳасидаги ҳамкорликни ривожлантиришга қўшган муносиб ҳиссаси учун Ханс Клюгега Тошкент тиббиёт академияси профессори фахрий унвони ҳамда «Ўзбекистон Республикаси соғлиқни сақлаш аълочиси» кўкрак нишони топширилди.
Ташриф мобайнида меҳмонларнинг бир қатор тиббиёт муассасалари ва ихтисослаштирилган илмий-амалий тиббиёт марказлари фаолияти билан ҳам танишиши режалаштирилган.
Маълумот учун, ЖССТнинг Европа минтақавий бюроси дунёнинг турли ҳудудларида жойлашган олтита минтақавий идораларидан биридир. Мазкур буюрга 53 та мамлакат, жумладан, Ўзбекистон ҳам аъзо бўлиб, Атлантикадан Тинч океанигача бўлган улкан ҳудудни қамраб олади. Соғлиқни сақлашнинг турли йўналишларида илмий ва техник мутахассислар жамоасидан иборат бюронинг бош штаби Копенгагенда жойлашган. Унинг 29 та мамлакатда 4 та филиали ва идоралари фаолият юритиб келади.
Мавзуга оид, ўтган йилнинг май ойида Женевада бўлиб ўтган Жаҳон соғлиқни сақлаш ассамблеясининг 72-сессиясида Ўзбекистон соғлиқни сақлаш вазири Алишер Шодмонов ЖССТнинг Европа минтақаси бўйича вице-президенти этиб сайланган эди.
