Жорий йилнинг 4 февралида «Ўзмиллийбанк» АЖ бош офисида Ўзбекистон Республикаси Президентининг 2019 йил 27 декабрь куни мамлакат ёшлари билан учрашувида «Ёшларга оид давлат сиёсати»ни янги босқичга олиб чиқишга қаратилган топшириқлар ижросини таъминлаш мақсадида очиқ эшиклар куни ташкил этилди.
Тадбирда «Ўзмиллийбанк» АЖ ҳамда Тошкент шаҳар прокуратураси ходимлари, Тошкент молия институти ва Тошкент иқтисодиёт коллежи ўқувчилари иштирок этди.
Дастлаб иштирокчилар учун банк бўйлаб экскурсия ташкил этилди. Жумладан, ёшлар «Ўзмиллийбанк» АЖ марказий амалиёт филиали фаолияти, филиалининг вазифаси, мижозларга кўрсатиладиган хизмат турлари билан яқиндан танишдилар.
Доим оргиналликка интилган «Ўзмиллийбанк» АЖнинг яна бир қизиқарли ва ўзига хос жиҳати шундаки, банк ўз фаолиятини бошлаган кезлариданоқ ташкилот қошида санъат асарлари галереяси ташкил этилган. Ушбу масканда бир неча асрлик тарихга эга 200 мингдан ортиқ танга, 3 мингдан ортиқ қўлёзма ва суратлар сақланади. Тарихий бойликларни келажак авлодга етказиш галереянинг асосий мақсади ҳисобланади. Бебаҳо нумизматик экспонатларининг бир қисми банкнинг бош офисида сақланади. Экскурсия давомида талаба ёшлар экпозициядан ўрин олган тангалар ҳақида маълумотга эга бўлдилар.
Шундан сўнг конференциялар залида «Ўзмиллийбанк» АЖ масъул ходимлари ва ёшлар учрашуви бўлиб ўтди. Анжуман давомида ёшлар эътиборига банкнинг тарихи, эришиб келаётган ютуқлари, устувор вазифалари, Республикамиз иқтисодиёти ривожига қўшаётган ҳиссаси ҳақида маълумот берувчи тақдимот ҳавола этилди. Дарҳақиқат, мазкур ташкилот кўплаб юқори кўрсаткичлари билан фахрлана олади. Жумладан, «Ўзмиллийбанк» АЖ банк активларининг ҳажмига кўра Ўзбекистонда биринчи ўринни, Ўрта Осиёда эса Қозоғистон Халқ банкидан сўнг иккинчи ўринни эгаллайди.
Шу билан бирга, ёшлар «Ўзмиллийбанк» АЖ томонидан жорий этилиши режалаштирилаётган, NFC ҳамда QR тўловлар, электрон коммерсия, янги имтиёзларга эга халқаро тўлов карталари турлари каби янги инновацион лойиҳалар билан танишдилар. Меҳнат самарадорлиги ва хизмат сифатини ошириш, ходимларни рағбатлантириш, тизимини ривожлантириш мақсадида татбиқ этилиши кутилаётган KPI ва бонусли тизим ҳақида ҳам маълумот бериб ўтилди. Шу ўринда талаба ёшларни, мамлакатимизнинг нуфузли тижорат банкларидан бири бўлган «Ўзмиллийбанк» АЖда фаолият юритаётган ёшлар сони қанча эканлиги қизиқтирди. Маълумот берилганидек, жорий йилнинг 1 январь ҳолатига кўра, мазкур банк ходимларининг сони 5 849 тани ташкил этган бўлса, шундан 35% ёшлар ҳисобига тўғри келади.
Учрашув қизғин баҳс-мунозараларга бой ўтди. Ёшлар ўзларини қизиқтирган, банкда трансформация жараёнининг кечиши, «Ўзмиллийбанк» АЖда рақамли технологияларни янада ривожлантириш учун қандай ишлар амалга оширилаётганлиги, филиаллар ўрнида ташкил этилаётган банк хизматлари марказларининг вазифалари ва афзалликлари ҳақидаги саволларига атрофлича жавоб олдилар. Тадбир сўнгида эса талаба ёшларга эсдалик совғалари топширилди.
Реклама ҳуқуқи асосида.
Изоҳ (0)