Комил Алламжонов Ахборот ва оммавий коммуникациялар агентлиги (АОКА) раҳбарияти нималарга аҳамият бериши кераклиги бўйича ўз тавсияларини берди.
Фото: «Дарё»
«Дарё» мухбири Мусулмонбек Иброҳимовнинг хабар беришича, 2 февраль, якшанба куни, бўлиб ўтган Миллий масс-медиани қўллаб-қувватлаш ва ривожлантириш жамоат фондининг очилиш маросимида фонднинг Васийлик кенгаши раиси Комил Алламжонов АОКАда ўтган раҳбарик фаолиятига тўхталиб ўтди.
Журналист ва блогерлар учун керакли бўлган барча экомуҳитни ярата олдик ва ўтган бир йил давомида агентлик томонидан матбуотни ҳақиқий маънода «тўртинчи ҳокимият» даражасига олиб чиқиши мумкин бўлган тизим яратилди, деб ҳисоблайман.
Вазирлик ва идораларнинг матбуотга бўлган муносабати тубдан ўзгариб, тан олиш керак, амалдорлар матбуот билан ҳисоблашиб иш кўрадиган бўлди. Энди ушбу жараён ва тизим мендан кейинги раҳбарлар томонидан тўғри ва сифатли давом эттирилиши жуда ҳам муҳим.
Комил Алламжонов, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси
Аввалроқ, 29 январь куни Президент Администрацияси ҳузуридаги Ахборот ва оммавий коммуникациялар агентлиги директори вазифасини бажарувчи Комил Алламжонов ва унинг ўринбосари Саида Мирзиёева истеъфога чиққан эди. 31 январь куни бўлиб ўтган Миллий масс-медиани қўллаб-қувватлаш ва ривожлантириш жамоат фонди муассислари йиғилишида Комил Алламжонов фонднинг Васийлик кенгаши раиси, Саида Мирзиёева эса унинг ўринбосари этиб сайланганди.
Миллий масс-медиани қўллаб-қувватлаш ва ривожлантириш жамоат фондининг асосий мақсади — оммавий ахборот воситаларини янада ривожлантириш ҳамда журналист ва блогерларнинг ҳуқуқларини рўёбга чиқаришда кўмак бериш, мамлакатда сўз эркинлигини мустаҳкамлашда жамоатчилик институтининг ролини ошириш, Ўзбекистоннинг халқаро имижини янада яхшилашга кўмаклашиш ва бошқалардир.
