Ижтимоий тармоқларда Мирзо Улуғбек туманидаги 451-мактабгача таълим ташкилоти, шунингдек, 70, 76, 78, 9 ва 105-уйлар олдига «қабристондан олиб келинган» дейилаётган тупроқ ташланганига оид фото ва видеохабарлар тарқалди. Тошкент шаҳар ҳокимлиги ушбу ҳолат юзасидан изоҳ берди.
Ҳокимлик матбуот хизмати жамоаси Мирзо Улуғбек туманидаги «Элобод» маҳалласи ҳудудида бўлган. Бу ерда маҳаллий аҳоли орасида машҳур бўлган, бевосита қабристон яқинида қурилган «Мулла Қосим» қабристони жойлашган. Масжид кичик ва эски бўлгани боис, унинг ўрнида 0,55 гектар майдонда янги масжид қурилиши режалаштирилган.
«Қурилиш ишларига жалб этилган техника қабрлар кўмилган жойларда ишламаган. Бундан ташқари, маҳаллий оқсоқоллар ва қабристон ишчисининг сўзларига кўра, қабрлар олдидаги барча ишлар ушбу мозорда дафн этилганларнинг қариндошлари гувоҳлигида амалга оширилган», — дейилади Тошкент шаҳар ҳокимлиги ахборотида.
Маҳалла оқсоқоли ва қабристони ишчиси ижтимоий тармоқларда шов-шув бўлган ҳодисага муносабат билдираркан, бевосита масжид ҳудудида ҳеч қандай қабрлар бўлмаганини ва бу ердан олиб чиқиб кетилган тупроқда инсон қолдиқлари бўлиши мумкин эмаслигини таъкидлаган.
451-мактабгача таълим ташкилоти олдида қолдирилган тупроқ уюми ичидан суяклар чиққани билан боғлиқ ҳолат ҳам ўрганилган. Маҳалла раисининг таъкидлашича, боғча олдида қолдирилган тупроқнинг собиқ масжиддан олиб чиқилган тупроққа алоқаси йўқ. У яқин атрофдаги котлован қазилган бошқа қурилиш майдонидан олиб келинган.
«Тупроқ уюмларини танлама қазиш вақтида суяклар топилмади. Тупроқ уюмини экскаватор воситасида текислаш вақтида ҳам суяклар чиққани йўқ», — дейилади Тошкент шаҳар ҳокимлиги ахборотида.
Изоҳ (0)