Фарғонада автомобилини жарима майдончасидан чиқариб бериш эвазига ЙПХ ходимига 500 минг сўм пора таклиф қилган ҳайдовчи қўлга олинди. Бу ҳақда «Дарё»га Фарғона вилояти ИИБ Йўл ҳаракати хавфсизлиги бошқармаси матбуот хизмати маълум қилди.
Қайд этилишича, 24 январь куни, жума куни соат 9:20 ларда Фарғона шаҳри Аэропорт кўчасида фуқаро Р.Т. бошқарувидаги «ВАЗ 2106» русумли автомашина ЙПХ инспектори Элёр Бегматов томонидан тўхтатилган.
Ходим ҳайдовчининг ёнида автомашинани бошқаришга оид ҳужжатлари йўқлигини аниқлаб, унга нисбатан тегишли тартибда маъмурий баённома расмийлаштирган. Автомашинани эса жарима майдонига жойлаштирган. Шундан сўнг ҳайдовчи маъмурий ҳуқуқбузарлик тўғрисидаги баённомани бекор қилиш ва машинасини жарима майдончасидан чиқариб бериш эвазига инспектор Элёр Бегматовга дастлаб 200 минг, кейинчалик 500 минг сўм пора таклиф қилган.
Инспектор унга бу ҳаракати ноқонунийлигини, пора олиш-бериш жиноят эканлигини тушунтиришига қарамасдан, пора таклиф қилишда давом этган. Инспекторга хизматда фойдаланиш учун бириктирилган бодикамера ёзувлари кўрилганда ушбу ҳолатлар ўз тасдиғини топган.
Шу куни соат 15:30 да ИИВ Ўз хавфсизлиги бошқармаси вилоят бўлими ҳамда иқтисодий жиноятларга қарши курашиш департаменти вилоят бошқармаси ходимлари томонидан ўтказилган тезкор тадбирда фуқаро Р.Т. ЙПХ инспекторига 500 минг сўм пулни пора тариқасида берган вақтида ашёвий далиллар билан ушланган.
Ҳозирда мазкур ҳолат юзасидан Департаментнинг Фарғона вилояти бўлими томонидан терговга қадар суриштирув ҳаракатлари олиб борилмоқда.
Изоҳ (0)