Мажбурий ижро бюроси фаолиятини тартибга солувчи меъёрий ҳужжатларда кам таъминланган оилалар учун имтиёз ёки алоҳида тартиб белгиланмаган. Бироқ жойларда бюро ходимлари томонидан бу жараёнга инсонпарварлик тамойили билан ёндашиб келинмоқда. Бу ҳақда «Дарё» мухбири Азизбек Абдувалиев хабар бермоқда.
МИБ Наманган вилояти бошқармаси бошлиғи Дилмурод Умаралиевга кўра, вилоятда ўтган йил ноябрь—декабрь ойлари давомида шаҳар ва туман бўлимлари томонидан 136 та кам таъминланган, эҳтиёжманд оиланинг салкам 63 миллион сўм қарздорлиги ҳудудда яшовчи тадбиркорлар, саховатпеша кишилар ёрдамида тўлаб берилди.
Жумладан, Наманган шаҳри «Атанган гузар» маҳалласида яшовчи Тожихон Умрзоқованинг электр энергиясидан бўлган 700 минг сўм қарздорлик ҳомийлар томонидан тўлаб берилди.
Чуст тумани «Сабзазор» маҳалласида истиқомат қилувчи Ойшаби Каримова боқувчиси йўқлиги, яшаш шароити кўнгилдагидек эмаслиги туфайли ҳомий томонидан электр учун 500 минг сўм тўлов қилиб берилди.
Учқўрғон тумани «Шалдирама» маҳалласида яшовчи Холисхон Валиеванинг электр энергиясидан 350 минг сўм қарздорлиги бор эди. Ҳудудга бириктирилган давлат инспекторининг маҳалла фаоллари билан ҳамкорлиги натижасида ушбу оиланинг қарздорлиги ҳал қилинди.
Шу туманнинг «Қозоқовул» маҳалласида истиқомат қилувчи Соҳибовлар хонадонининг ҳам электр энергиясидан бўлган 520 минг сўм қарздорлиги ҳомийлар ёрдамида тўлаб берилди.
— Бундай мисолларни яна кўплаб келтириш мумкин. Асосийси, бу каби тадбирлар давом эттирилмоқда, — дейди Дилмурод Умаралиев.
Изоҳ (0)