Ўзбекистонда коронавирус бўйича эпидемик вазиятдан хавотирланишига асос йўқ, бу борада барча чоралар кўрилган, деб хабар бермоқда ССВ матбуот хизмати. Бу ҳақда Соғлиқни сақлаш вазирлиги ва Санитария-эпидемиологик осойишталик агентлиги томонидан бугунги кунда долзарб бўлиб турган коронавирус ҳамда грипп касалликларига бағишлаб АОКАда ўтказилган матбуот анжуманида айтилди.
Анжуманда Хитойнинг Ухань шаҳрида юзага келган коронавируснинг янги типи эпидемияси юзасидан батафсил маълумот берилди. 23 январь тонгги ҳолатидаги маълумотларга кўра, Хитойда 600 дан зиёд ҳолатда коронавирус касаллиги аниқланган. Ушбу хасталикдан 17 нафар инсон вафот этган.
Ушбу ҳолат юзасидан 22 январь куни Жаҳон соғлиқни сақлаш ташкилоти томонидан ўтказилган фавқулодда йиғилишда мутахассислар халқаро фавқулодда ҳолат эълон қилишдан олдин авж олган касаллик ҳақида кўпроқ маълумот олишлари керак, деган қарорга келинган. ЖССТ расмийлари учрашувни пайшанба куни, Хитой ҳукумати таклифига биноан Уханга бир қатор Осиё мамлакатларидан келган шифокорлардан маълумот олганидан сўнг давом эттиришга қарор қилган.
Таъкидланишича, ЖССТ раҳбари Тедрос Гебреесус ваҳима кўтаришга ҳеч қандай сабаб йўқлигини айтган. Унинг сўзларига кўра, Хитойнинг Ухань шаҳрида самарали карантин бўйича кўраётган жуда қатъий чоралари эпидемиянинг мамлакатда авж олишнинг олдини олишга ҳамда унинг тарқалиш эҳтимолини камайтиришга ёрдам беради. Бундан ташқари, Европа соғлиқни сақлаш идоралари ушбу вируснинг тарқалиш хавфини «ўртача» деб баҳолашмоқда. Шу билан бирга, ЖССТ коронавирус хавфининг олдини олиш бўйича ўз тавсияларини ҳам берган.
Вазирлик хабарида айтилишича, Хитойда коронавирус бўйича эпидемик вазият мураккаблашиши сабабли Ўзбекистонда қатор чора-тадбирлар амалга оширилмоқда. Жумладан, Uzbekistan Airports АЖ ҳамда «Ўзбекистон темир йўллари»АЖ Тиббий-санитария хизмати томонидан давлат чегарасини, айниқса, Хитойни кесиб ўтган шахсларнинг юқори сифатли тиббий мониторингини амалга ошириш чоралари кўрилмоқда. «Ўзбекистон темир йўллари» ҳамда «Ўзбекистон ҳаво йўллари» АЖ тизимидаги фаолият юритаётган ходимлари иштирокида эпидемик вазият ва унинг олдини олиш юзасидан семинарлар ўтказилган.
Бундан ташқари, Республика Вирусология илмий текшириш институти интенсив терапия бўлимида коронавирусга гумон қилинган беморларни қабул қилиш учун махсус бокс тайёрлаб қўйилган. Республикадаги аэропорт ва темир вокзаллари санитария карантин пунктларида ушбу касалликка гумон қилинган бемор аниқланса, уни дарҳол изоляторга изоляция қилиш, коронавирусга лаборатор таҳлилини ўтказиш учун намуна олиш тартиби белгилаб қўйилган.
ССВ ҳузуридаги Санитария-эпидемиологик осойишталик агентлиги томонидан коронавирус инфекциясининг янги турини юртимиз ҳудудига четдан кириб келиши ва тарқалишининг олдини олиш чора-тадбирлар режаси ишлаб чиқилган. Коронавируснинг янги тури (nCoV) қарши олиб бориладиган профилактик ва эпидемияга қарши чора-тадбирларни ташкил этиш ҳамда амалга ошириш тўғрисидаги методик услубий қўлланма ҳам тайёрланган.
Анжуманда коронавирус касаллигининг олдини олиш бўйича олиб борилаётган ишлар Соғлиқни сақлаш вазирлиги ҳамда Санитария-эпидемиологик осойишталик агентлиги томонидан қатъий назоратга олингани, Хитойдаги коронавирус бўйича эпидемик вазиятдан юртимиз аҳолисининг хавотирланишига асос йўқлиги таъкидланди.
Изоҳ (0)