Чироқчиликлар мол ўғрилари ИИБ эътиборидан четда қолаётганидан шикоят қилганди. Туман ИИБ вазиятга изоҳ берди

Чироқчи туманининг Лангар қишлоғида яшовчи фуқаролар чорва моллари йўқолаётгани ва ИИБ ходимлари бунга эътибор бермаётганидан шикоят қилганди. Туман ИИБ раҳбари Фазлиддин Юсуповнинг айтишича, мол ўғриларини аниқлаб, қўлга олиш ҳаракати бошланган. Бу ҳақда вилоят ИИБда бўлиб ўтган матбуот брифингида маълум қилинди, дея хабар беради «Дарё» мухбири.

Видеомурожаатда чиқиш қилган аҳоли вакилларидан бири Маҳмуд Иброҳимов чорва моллари боғлаб қўйган жойидан йўқолганини, унга берилган жавоб хатлари эса кўпайиб кетса-да, натижа чиқмаётганини айтган. Мол учун мўлжалланган жойда ётиб, қўриқчилик қилаётганини қўшимча қилган.

Фуқаро Ўктам Мейлиев эса 2014 йил май ойида 2 бош сигирини ўғирлатганини айтиб, мутасадди ташкилотларга 21 маротаба мурожаат қилганини гапиради.

— Уят бўлса ҳам айтаман, oғилимга келиним ҳам навбатда туради. Молхона мол учун, одам учун эмас. Лангарликман дейишга уяламан, — дейди Ўктам Мейлиев.

Чироқчи туман ИИБ раҳбарининг маълумот беришича, Ўктам Мейлиевнинг мурожаати бўйича 2014 йил июнь ойида жиноят иши қўзғатилган. Аммо йўқолган мол ҳали топилмаган.

Матбуот брифингида таъкидланишича, 10 нафар фуқаро мол йўқотганини айтиб, ижтимоий тармоқларда мурожаат йўллаган. Мазкур мурожаатни жойида ўрганиш учун Чироқчи тумани ИИБ бошлиғи Фазлиддин Юсупов ҳамда прокурор Баҳодир Худойқулов Лангар қишлоғида бўлган.

— Ярим кечаси соат 3 гача қишлоқда юрдик, атайлаб одамларнинг молхонаси олдига ҳам бордик. Ҳамма жой қоп-қоронғи. Ҳеч ким кўчага чиқиб, қишлоқда ким юрибди, бегоналар кимлар деб қизиқмади, — дейди Фазлиддин Юсупов. — Шу даражада эътиборсиз.

Фазлиддин Юсуповнинг қўшимча қилишича, қишлоқ аҳли чорва молларини чўпонсиз далага ҳайдаб юборади ва кечки пайт молларнинг ўзи қайтиб келади.

— Шу боисдан ҳам аксарият чорва моллари адашиб далада қолиб кетиши ёки бошқа жойга кетиб қолиши, ўлган бўлиши мумкин, деган тахминимиз бор. Айнан ўғирланмаган бўлиши ҳам мумкин. Боиси, молларнинг ўлиги ҳам топилди-да.

Чироқчи ИИБ раҳбарининг айтишича, суриштирув ишлари бошлагандан сўнг ўғирликда гумон қилинган тўда қўлга олинган.

— Аммо бу ҳақда ҳозирча тўлиқ маълумот беролмаймиз, — дейди масъуллар.