Шавкат Мирзиёев: Ўзбекистоннинг бутун тизимини йўқ қилишга ҳаракатлар бўлган

Олий Мажлис Қонунчилик палатасининг сайловдан кейинги биринчи мажлисида сўзга чиққан Президент Шавкат Мирзиёев 1980 йиллар охири ва 1990 йиллардаги парламент фаолияти ва мамлакат ҳаёти ҳақида фикр билдирди, дея хабар бермоқда «Дарё» мухбири Миролим Исажонов.

Мен 1989 йилги парламентдаги курашларни — қаерда ўтириб, қаерда сўзга чиққаним, кимлар у ерда қарши бўлган — яхши эслайман. Ўзбекистоннинг бутун тизимини йўқ қилишга ҳаракатлар бўлган — 10—20 дақиқа, сониялар қолган эди. Жуда катта тайёргарликлар бўлган.

Бир шахснинг шарофати билан мана шу тинчлик-осойишталикни, тизимни сақлаб қолдик. Ўшанда биринчи Президентимиз Ислом Абдуғаниевичнинг ёнида бўлганман. Ўша вақтда Москвадан парламент аъзолари келиб ўтирарди, ҳамма томошабин эди.

Мустақиллик йилларида биз қийин, лекин машаққатли, ўзимизга муносиб йўлни босиб ўтдик. Ҳеч қачон унутмаслигимиз керак — қийин бўлди, лекин кўп хатолар ҳам бўлди. Энди хатоларни такрорламаслик учун биз бошқа — янги Ўзбекистонга муносиб янги парламентини йўлга қўйишимиз керак.

Шавкат Мирзиёев, Ўзбекистон Президенти