Ахборот ва оммавий коммуникациялар агентлиги бош директори Комил Алламжонов Шавкат Мирзиёев қарори билан Жиноят кодексидан туҳмат ва ҳақорат учун озодликдан маҳрум этишни чиқариб ташлаш бўйича қонун лойиҳаси ишлаб чиқилганини маълум қилди.
Комил Алламжонов Telegram’даги расмий каналида маълум қилишича, қонун-лойиҳаси муҳокама учун норматив-ҳуқуқий ҳужжатлар лойиҳалари порталига жойланди.
Аввалроқ АОКА бош директори Комил Алламжонов Президент Конституция ва қонун устуворлигини таъминлашга қаратилган қарор имзолагани ва ҳужжатда агентлик зиммасига муҳим вазифалар юклатилганини таъкидлаганди.
Қонун қабул қилинса, агентлик зиммасига бир қатор муҳим вазифалар юклатилади. Хусусан:
- Туҳмат ва ҳақорат учун озодликдан маҳрум қилиш билан боғлиқ бўлган нормани бекор қилиш масаласи кўриб чиқилади;
- Суд тизимида шаффофликни ва жамоатчилик назоратини янада кучайтириш мақсадида журналистлар ва фуқароларнинг очиқ суд мажлисларида иштирок этиши, судларнинг веб-сайтлари ва матбуот котиблари ишини яхши ташкил қилиш бўйича Олий суд Пленумининг қарори қабул қилинади;
- Ҳамон оғир аҳволда қолаётган босма нашрлар борасида — давлат органлари муассис бўлган босма ОАВни кучайтириш, таҳририят ходимларининг меҳнатига ҳақ тўлашни яхшилаш ҳамда босма нашрлар веб-сайтларини ривожлантиришга қаратилган Ҳукумат қарори лойиҳаси ишлаб чиқилади;
- «Телерадиоэшиттиришлар тўғрисида»ги қонун ишлаб чиқилади ва «Оммавий ахборот воситалари тўғрисида»ги қонунга ўзгартишлар киритилади. Шу жумладан, теле ва радиостанцияларга лицензия бериш жараёни соддалаштирилади ҳамда давлат органлари ва мансабдор шахсларнинг журналистларга нисбатан ноқонуний хатти-ҳаракатлари ёки қарорларидан ҳимоя қилиш тизими кучайтирилади;
- Ўзбекистондаги барча давлат органлари фаолиятининг очиқлигини, уларнинг ОАВ билан алоқаларини кучайтириш бўйича чоралар ишлаб чиқамиз.
Изоҳ (0)