Ўзбекистонда хизмат кўрсатган артист Райҳон Ғаниева «Миллий» телеканалининг «Нишонда» дастурига берган интервьюсида собиқ турмуш ўртоғи Йигитали Мамажонов билан нима сабабдан ажрашгани ҳақида гапирди.

Аслида биз умуман бир-бирига ўхшамайдиган, турли қараш ва принципларга эга инсонлармиз. Турмуш қуришимизга барча қариндошларимиз қарши эди. Улар инсон кўнглига яқин, сўзлашиш учун умумий мавзулари бор инсонни умр йўлдош сифатида танлаш кераклигини айтганди.

Шунингдек, икки инсон турмуш қуриши учун улар оилада бир хил тарбия топган бўлиши ҳам керак. Бир-бирига ҳар жиҳатдан мос бўлиши керак. Биз эса бутунлай бошқа-бошқа одамлар эдик. Шунинг учун ҳам муроса қила олмадик.

Лекин ҳозир, фикримча, Муқаддас (Саъдуллаева) — Йигиталига жуда ҳам мос. Уларни жуда яхши жуфтлик деб биламан. Мен уларга чин дилдан бахт тилайман. Эшитишимча, улар икки фарзандли ҳам бўлибди. Бахтли бўлишсин.

Улардан ягона илтимосим — бизсиз бахтли бўлишсин. Бизни тинч қўйишсин. Мен ҳар доим фарзандларим учун қайғураман. Эртага улар катта бўлади. Уларнинг қулоғига турли гап-сўзлар, ғийбатлар етиб келишини хоҳламайман.

Райҳон Ғаниева, Ўзбекистонда хизмат кўрсатган артист

Хонанда Райҳон Ғаниева ва актёр Йигитали Мамажонов 2012 йилнинг ноябрида турмуш қурган эди. 2014 йилнинг май ойида эса Райҳон эгизак фарзандларни дунёга келтирган, уларга Ислом ва Имрон деб исм қўйилган эди.

2016 йилнинг май ойида Йигитали Мамажонов ва Райҳоннинг никоҳи расман бекор қилингани маълум бўлди. 2016 йилнинг 29 октябрь куни Райҳон актёр ва бошловчи Фарҳод Алимов билан иккинчи марта турмуш қурди.

Йигитали бу орада чимкентлик Нигина исмли қиз билан турмуш қуриб, қиз фарзанд кўрди, кўп ўтмай актёрнинг бу турмуши ҳам ўхшамагани ойдинлашди. 2018 йил декабрида Йигитали актриса Муқаддас Саъдуллаевага уйлангани маълум бўлди. Йигитали ва Муқаддас икки фарзандли бўлди.