Қашқадарёда далани пайҳон қилган қўйлар вилоят ҳокими вазифасини бажарувчи Зоир Мирзаев топшириғига кўра сўйиб ташлангани ҳақида хабарлар пайдо бўлганди. Видеода ўзгалар мулки бўлган қўйлар сўйилиб, кам таъминланган фуқаролар ва усталарга тарқатилаётгани айтилган. Ўз навбатида, вилоят ҳокимлиги Зоир Мирзаев қўйларни сўйиш ҳақида топшириқ бермаганини маълум қилган.

Қашқадарё вилояти прокуратураси ҳам ушбу воқеа юзасидан расмий баёнот берди. Идоранинг баёнотида маълум қилинишича, мазкур видеолавҳада вилоят қишлоқ хўжалиги инспекцияси бошлиғи Акром Арипов, Нишон тумани ИИБ бошлиғи Дилшод Умаров, Ибн Сино ҳудудидаги «Отамурод ота» фермер хўжалиги раҳбари Шерзод Бобоназаров ҳамда далани пайҳон қилган 21 бош қўй эгаси Абдурашид Азаматов иштирокида вилоят ҳокими топшириғига кўра, ғалла майдонини пайҳон қилингани учун фермер хўжалиги раҳбари ва қўйлар эгасига тегишли 1 тадан (жами 2 бош) қўйни сўйиб, кам таъминланган оилаларга тарқатилиши ҳолати акс эттирилган.

Мазкур ҳолат Нишон тумани прокуратурасининг «Шакл-1» китобига рўйхатга олиниб, тегишли тартибда хизмат текшируви тайинланган бўлиб, тарқатилган ведиолавҳанинг ҳаққонийлиги, қачон, қаерда ва қандай ҳолатларда юз берганлиги ҳамда бошқа ҳолатлар ўрганилмоқда. «Ўрганиш натижалари ҳар томонлама қонун доирасида кўриб чиқилиб, қонуний қарор қабул қилиниши вилоят прокуратураси томонидан назоратга олинган», — дейилади вилоят прокуратурасида баёнотида.

Маълумот учун, ҳукуматнинг 2008 йил 10 декабрдаги қарорига мувофиқ, «экинзорлар пайҳон қилинган жойда ушланган чорва молларининг фуқароларнинг ўзини ўзи бошқариш органларига топширилиши ҳамда улар фақат чорва моллари эгасига нисбатан қонун ҳужжатларида белгиланган тартибда маъмурий жазо чоралари қўллангандан сўнг ва етказилган зарар тўлиқ ундириб олингандан кейин қайтариб берилиши» керак.

Бухорода ҳам 2018 йилнинг октябрь ойида шу каби икки ҳокат содир бўлганди. Пахтани пайҳон қилган қўйлар ва бир бош эчки сўйилиб, гўшти кам таъминланган оилалар ва боғчага тарқатилган. Иккала ҳолат юзасидан ҳам Маъмурий жавобгарлик тўғрисидаги кодекснинг 104-моддаси (экинзорларни пайҳон қилиш, қишлоқ хўжалик экинларининг далада тўплаб қўйилган ҳосилига зарар етказиш ёки уни йўқ қилиб юбориш, кўчатларга шикаст етказиш)га асосан тегишли ҳужжатлар расмийлаштирилган.