Андижон шаҳар матбуот хизмати ходимига нисбатан иш қўзғатилди. У журналист-блогерга туҳмат қилганликда айбланмоқда

Андижон шаҳар ҳокимлиги матбуот хизмати раҳбари Гулшаной Қошқаровага нисбатан, у Андижон шаҳар ҳокимлигининг расмий Telegram канали орқали журналист-блогер Хуршид Далиевни ҳақорат қилиб, унга нисбатан туҳмат қилгани учун Маъмурий жавобгарлик тўғрисидаги кодекснинг 40-моддаси (Туҳмат, яъни била туриб ёлғон, бошқа бир шахсни шарманда қилувчи уйдирмаларни тарқатиш) билан маъмурий иш қўзғатилди.

«Human.uz»нинг ёзишича, Хуршид Далиевнинг шикоятига асосан Андижон шаҳар ИИБ томонидан ўтказилган терговга қадар текширув ҳаракатлари якунига кўра шундай қарор қабул қилинган. Тўпланган ҳужжатлар 2019 йилнинг декабрь ойида кўриб чиқиш учун Андижон шаҳар маъмурий судига юборилган. Суд иши қачон бошланиши тўғрисида маълумотлар йўқ.

Журналист Хуршид Далиев ўзининг Telegram канали орқали ҳудудлардаги ижтимоий муаммоларни ёритиб боради. Шунингдек, у «Human.uz» муассиси Human Media МЧЖ бош директори ҳисобланади.

Аввалроқ Facebook ижтимоий тармоғида «Отабек Нуритдинов» тахаллуси билан воқеа-ҳодисаларга ўз муносабатини билдириб келган фуқаро-блогер Абдуфатто Нуритдинов туҳмат қилганликда айбланиб, 15 сутка маъмурий қамоқ билан жазолангани ҳақида хабар берилган эди.