Тошкент тиббиёт коллежи талабаси Жасурбек Иброҳимовнинг ўлимида айбдор деб топилиб, суд қарорига биноан озодликдан маҳрум этилган, кейинчалик жазо муддатини ўташ вақтида колониядаги режимни бузмагани ва меҳнатга виждонан ёндашгани туфайли муддатидан илгари озод этилган Ислом Тўлаганов айни пайтда Олмазор туманидаги тиббиёт коллежида ўқиётгани ҳақида хабар берилган эди. Бош прокуратура мазкур хабар юзасидан баёнот берди.
Маълум қилинишича, Жиноят ишлари бўйича Миробод туман судининг 2017 йил 30 октябрдаги ҳукми билан 1999 йилда туғилган, Боровский номидаги тиббиёт коллежи ўқувчиси Тўлаганов Исломбекка Жиноят кодексининг 104-моддаси 3-қисми «д» банди билан Жиноят кодексининг 85-моддаси асосида 6 йил муддатга озодликдан маҳрум қилиш жазоси тайинланган.
Мавзуга доир: Жасур Иброҳимовнинг ўлимида айбдор деб топилган Исломбек Тўлаганов 6 йилга озодликдан маҳрум этилди
2018 йил 20 декабрда Навоий шаҳар судининг ажрими билан Ислом Тўлаганов жазо ўташ муассасаси томонидан келтирилган жазонинг ўталмаган қисмини енгилроғи билан алмаштириш ҳақидаги тақдимнома асосида унга тайинланган озодликдан маҳрум қилиш жазосининг ўталмаган 4 йил 5 ой 15 куни худди шу муддатга ахлоқ тузатиш ишлари жазосига иш ҳақининг 20 фози давлат даромадига ушлаб қолиш шарти билан алмаштирилган.
Маълум қилинишича, Ислом Тўлаганов жазоси алмаштирилганидан сўнг 2018 йил 27 декабрда Мирзо Улуғбек тумани ИИО Пробация гуруҳига рўйхатга қўйилган.Ислом Тўлаганов 2019 йил 5 январда шартнома асосида «Феруз-1 коммуналчи» ХУЖМШга ишга қабул қилинган, 2019 йил 1 мартда ушбу ХУЖМШ ҳисобида пул маблағи йўқлиги сабабли у ишдан бўшатилган.У 2019 йил 13 апрелда «Навниҳол коммунал» МЧЖ Профессионал бошқарув компаниясига ишга қабул қилиниб, ярим ставка асосида ишчи лавозимида ахлоқ тузатиш ишлари жазосини ўтамоқда.
Ислом Тўлаганов билан Мирзо Улуғбек тумани ИИО Пробация гуруҳи катта инспектори ва Тошкент шаҳар ИИБ Пробация бўлими бошлиғи қайта жиноят содир этмаслик тўғрисида профилактик суҳбат ўтказган.
Шунингдек, ўрганиш давомида Ислом Тўлагановнинг отаси ўғлининг ўқишини қайта тиклаш тўғрисида Ўзбекистон Республикаси Олий ва ўрта махсус таълим вазирлиги Касб-ҳунар таълими маркази ҳамда Соғлиқни сақлаш вазирлигига ариза билан мурожаат қилгани маълум бўлган.Мазкур ташкилотлар томонидан ариза ўрганилиб, Ислом Тўлагановнинг ўқишини Боровский тиббиёт коллежига қайта тиклаб, Олмазор тиббиёт коллежининг «Лаборатор диагностика» йўналишига 2-босқичнинг 2-семестридан ўрнатилган тартибда кўчиришга рухсат берилган. Бу ҳақда 2019 йил 2 апрелда Тошкент шаҳар касб-ҳунар таълими ҳудудий бошқармаси Боровский тиббиёт коллежи ва Ислом Тўлагановнинг отасига хат юборган.
Мазкур хат асосида Олмазор тиббиёт коллежи директорининг 2019 йил 5 апрелдаги буйруғи билан Ислом Тўлаганов ушбу коллежнинг «Лаборатор диагностика» йўналишига 2-босқич 214-гуруҳ ўқувчилари сафига қабул қилиниб, 4-семестрдан ўқишни давом эттиришга рухсат берилган.
Мавзуга доир: Исломбек Тўлаганов коллеждаги ўқишини давом эттирмоқда
Жиноят ишлари бўйича Тошкент шаҳар суди кассация инстанциясининг 2018 йил 12 январдаги ажрими билан жиноят ишлари бўйича Тошкент шаҳар Миробод туман судининг 2017 йил 30 октябрдаги Ислом Тўлагановга нисбатан ҳукми ўзгаришсиз қолдирилган.
Ҳозир вақтда мавжуд касаллик варақалари Жиноят ишлари бўйича Миробод туман судида ушбу жиноят иши ҳужжатлари билан бирга сақланмоқда.
Изоҳ (0)